د ونزویلا لنډمهالې ولسمشرې، دلسي رودریګز، اعلان وکړ چې حکومت یې د سیاسي بندیانو لپاره د عمومي بښنې طرحه چمتو کړې ده. هغې وویل چې د کاراکاس بدنام زندان «هېليکوییډ» به د سپورټ او ټولنیزو خدمتونو په مرکز بدل شي.
مېرمن رودریګز دا څرګندونې د ونزویلا د سترې محکمې په مقر کې د ۲۰۲۶کال د قضايي دورې د پرانیستې په مراسمو کې وکړې. هغې د هېواد له قانونجوړوونکو وغوښتل چې له دې طرحې سره «تر ټولو لوړه همکاري» وکړي، څو د سیاسي شخړو، تاوتریخوالي او افراطیت له امله رامنځته شوي ټپونه ورغېږي او عدالت بېرته ټینګ شي.
بلخوا، د نوبل د سولې جایزې ګټونکې، ماریا کورینا ماچادو، د دې طرحې په غبرګون کې ویلي چې نوې عمومي بښنه «هغه اقدام نه دی چې رژیم یې په خپله خوښه ترسره کړي وي، بلکې د امریکا د متحده ایالاتو د فشار پایله ده.»
هغې هیله څرګنده کړه چې سیاسي بندیان به ډېر ژر خوشې او له خپلو کورنیو سره یوځای شي.
