د پاکستان د دفاع وزیر خواجه اصف په بلوچستان کې نننیو بریدونو ته په غبرګون ویلي، چې دا بریدونه د حقونو د مبارزې لپاره نه، بلکې د بهرنیو په ملاتړ ترهګري ده او موخه یې د پاکستان او بلوچستان خلک په نښه کول دي.
د پاکستان په بلوچستان ایالت کې د بلوچ ازادۍ پوځ لهخوا هممهاله په څو سیمو کې تر بریدونو وروسته د یاد هېواد د دفاع وزیر خواجه اصف ویلي، چې دا بریدونه «د حقونو لپاره مبارزه نه، بلکې دا له بهرنۍ ملاتړه برخمنه ترهګري ده او موخه یې د بلوچستان د خلکو په نښه کول دي».
نوموړي بلوچ د ازادي پوځ «عناصر» بللي دي او وايي:«دا عناصر نه پرمختګ زغمي او نه سوله، له همدې امله دوی کارګران، مساپر او عادي وګړي په نښه کوي او غواړي پرمختیايي پروژې او د کار فرصتونه لهمنځه یوسي».
نوموړي ادعا کړې، چې د بلوچ ازادۍ پوځ د جرمي شبکو، د نشهيي توکو له اقتصاد، باج اخیستنې او قاچاق څخه مالي مرستې ترلاسه کوي.
خواجه اصف ویلي، چې پاکستان به د یادې ډلې پر وړاندې سخت اقدامات وکړي.
دا په داسې حال کې ده، چې د بلوچ ازادۍ پوځ نن د شنبې په ورځ پر یوه وخت په کویټه، سیبۍ، چین او نورو سیمو کې بریدونه وکړل. په یادو بریدونو کې دواړو لورو ته د اوښتو تلفاتو په اړه ضد او نقیص راپورونه ورکړل شوي دي.
