د ایران په مشهد ښار کې د طالبانو قونسل مولوي نورمحمد متوکل د خراسان رضوي له والي ډاکټر غلام حسین مظفري سره په لیدنه کې د دواړو هېوادونو ترمنځ د سوداګریزو همکاریو د پراخېدو، د ویزو د بهیر د اسانتیا او د افغان کډوالو د ستونزو د حل پر لارو چارو خبرې کړې دي.
د طالبانو قونسلګرۍ د خبرپاڼې له مخې، په دې لیدنه کې د هرات او خراسان رضوي د واليانو ترمنځ د پخوانیو تفاهماتو د عملي کېدو پر تعقیب ټینګار شوی او د دواړو لورو ترمنځ د سوداګرۍ په برخه کې د توازن رامنځته کول یوه مهمه اړتیا بلل شوې ده.
خبرپاڼه زیاتوي، په ناسته کې همدارنګه د افغان اتباعو لپاره د ویزو د صادرېدو د اسانتیاوو، او په ایران کې د مېشتو افغان کډوالو د بېلابېلو ستونزو د هواري موضوعات مطرح شوي دي.
دواړو لوریو د اړیکو د پیاوړتیا، اقتصادي همکاریو د پراخېدو او د کډوالو د وضعیت د ښه کېدو لپاره د همغږۍ پر دوام ټینګار کړی دی.
