د طالبانو د صنعت او تجارت وزارت ویلي، چې د هلمند ولایت په مرکز لښکرګاه ښار کې د دوو خصوصي شرکتونو له لوري د «زموږ صنعت، زموږ ویاړ» تر نوم لاندې تولیدي توکو درېورځنی نندارتون پرانیستل شوی دی.
د وزارت د خبرپاڼې له مخې، دغه نندارتون چې د لښکرګاه په الماس جمنازیوم کې جوړ شوی، پکې د کابل، مزارشریف، هرات، کندهار، پکتیکا او یو شمېر نورو ولایتونو صنعتکارانو د شاوخوا پنځوس ډوله تولیدي توکو غرفې نندارې ته ایښې دي.
خبرپاڼه زیاتوي، په دې نندارتون کې صنعتکارانو د خپلو تولیداتو ځانګړتیاوې، تولیدي ظرفیتونه او د سوداګرۍ فرصتونه ګډونوالو ته ورپېژندلي دي.
