مایک پمپیو: له ایران سره هېڅ ډول ښه هوکړه شونې نه ده، امریکا باید په قوت سره عمل وکړي
د امریکا د بهرنیو چارو پخواني وزیر مایک پمپیو د اسراییل ۱۳چینل سره مرکه کې د امریکا او ایران ترمنځ د مذاکراتو په اړه ویلي: «زه د یوې رښتینې هوکړې لپاره هېڅ چانس نه وینم. هغوی ښايي پر ځینو مسایلو هوکړه وکړي، خو په ټوله کې یې له دې وړاندې هر ډول هوکړه ماته کړې ده».
نوموړي په خپلو خبرو کې همداراز زیاته کړې، چې دی هېڅ داسې فرصت نه ویني چې د یوې هوکړې امکان برابر کړي، سیمې ته امنیت او سوکالي راولي او د امریکا د خلکو لپاره هم ښه وي.
د هغه په وینا، امریکا باید له هرې شونې وسیلې څخه په استفادې پر ایراني حکومت فشار زیات کړي، ځکه تر هغو چې ایتالله پر واک وي، د هغو ځوانو ایراني معترضانو د ساتنې او د امریکایانو د امنیت د ټینګښت لپاره چې تر ټولو لوی خطر یې منلی او لارو او کوڅو ته راوتلي، بله هېڅ لاره نشته.
پمپیو د ایران او د هغه د متحدینو سختې کمزورۍ ته په اشارې سره وویل، چې اوسنی وضعیت په ایران کې د رژیم د بدلون لپاره یو تاریخي فرصت دی.
