په ناټو کې د امریکا سفیر فاکسنیوز ته ویلي، چې د کړکېچ کمولو توپ اوس د ایران په میدان کې دی او د ټرمپ صبر هم په ختمېدو دی. نوموړي ټینګار وکړ، چې د ایران ساحلونو ته د امریکا د سمندري بېړیو ځای پر ځای کول یوازې د ځواک ښودنه ده او ټرمپ د ایران د بېثباته کولو نیت نه لري.
وروسته له هغه چې د امریکا ولسمشر ډونالډ ټرمپ پر ایران د پوځي اقدام ګواښونه وکړل، امریکا خپل سمندري ځواک په منځني ختیځ کې ځای پر ځای کړی دی.
د رویټرز د راپور لهمخې، امریکا اوس مهال په سیمه کې ۶ لویې ویجاړونکې بېړۍ، یوه الوتکه وړونکې بېړۍ او ۳ نورې جنګي بېړۍ ځای پر ځای کړي، چې له امله یې د جګړې احتمال زیات شوی دی.
له دې سره، تهران بیا واشنګټن ته خبرداری ورکړی چې که پر دغه هېواد هر ډول برید وشي، پایله به یې یوه پراخه سیمهییزه جګړه وي.
