د پاکستان قاضي القضات ته د تحریک انصاف پرانېستی لیک؛ اساسي قانون د سقوط په حال کې دی
د پاکستان تحریک انصاف ګوند د یاد هېواد قاضي القضات ته په یوه پرانېستي لیک کې لیکلي، چې د پاکستان اساسي قانون د سقوط په درشل کې دی او د قضايي قوې اعتبار او د سترې محکمې خپلواکي له بحران سره مخ ده.
د پاکستان د تحریک انصاف ګوند د یکشنبې په سهار وختي (د سلواغې ۱۲مه) د دغه هېواد د سترې محکمې د رييس یا قاضي القضات په نوم یو پرانېستی لیک په خپله اېکس پاڼه خپور کړ.
تحریک انصاف ګوند په دغه لیک کې د یاد هېواد پر سترې محکمې نیوکه کړې او ویلي یې دي، چې اجراييه واک د خپلسریو پر وړاندې «شاتګ» کړی دی.
په لیک کې راغلي: «د محکمې امرونه د حکومت لهخوا په سپکاوي سره له پامه غورځول کېږي، خو قضایي قوې د خپلو پرېکړو د پلي کولو لپاره هېڅ پرېکنده ګام نهدی پورته کړی».
په لیک کې د پاکستان د پخواني لومړي وزیر عمران خان پر وړاندې د «سیاسي غچ اخیستنې» او د تحریک انصاف د زرګونو غړو د ناعادلانه نیولو او شکنجې یادونه شوې او زیاته کړې یې ده: «بنسټیز حقونه تر پښو لاندې شوي او په محکمو کې بېبرخلیکه پرتې دي. خبریالان، وکیلان، مدني فعالان د وېرې او سانسور له لارې غلي کړای شوي دي. د ګوند د غړو په زوره لادرکۍ او غیر قانوني نیونې په یو عادي امر بدل شوی دی».
د تحریک انصاف ګوند په لیک کې راغلي، چې د اساسي قانون د سرغړونو پر وړاندې چوپتیا یا ځنډ د بې طرفۍ په معنا نه، بلکې له ظالم سره د ملګرتیا په معنا ده.
په لیک کې د پاکستان له قاضي القضات څخه غوښتنه شوې، چې د محکمې حکمونه دې له استثنا پرته پلې کړي، سرغړونکي چارواکي دې د قانون منګولو ته وسپاري او د سیاسي بندیانو او لادرکه شویو کسانو په قضیو کې دې بیړنۍ اقدام وکړي.
د پاکستان قضایه قوې او په ځانګړې توګه قاضي القضات لا تر اوسه په دې تړاو څه غبرګون نهدی ښودلی.
