د طالبانو تر واک لاندې د کډوالو ستونزو ته د رسېدنې عالي کمېسیون وایي، چې تېره ورځ ۳۵۰ کډوالې کورنۍ چې ۱۸۸۴ کسان کېږي، له ایران او پاکستان نه افغانستان ته جبري ستنې شوې دي. د دغه کمېسیون د معلوماتو پر بنسټ، یادو کورنیو سره د اړتیا وړ مرسته هم شوې ده.
د کډوالو ستونزو د رسېدنې کمېسیون د راپور له مخې، دغه کډوال د ننګرهار تورخم، د کندهار سپین بولدک، د هرات اسلامکلا او د نیمروز د ورېښمو پله له لارې ستانه شوي دي.
راپور زیاتوي، له یادو کورنیو څخه ۳۱۸ کورنۍ چې ۱۷۵۳تنه دي د تورخم له لارې، ۲۰کورنۍ چې غړي یې ۱۰۲د سپین بولدک له لارې،۸ کورنۍ چې ۲۵تنه دي د ورېښمو پله له لارې، او ۴کورنۍ چې ۱۱تنه غړي یې وو د اسلامکلا له لارې افغانستان ته ستنې شوې دي.
یاده دې وي چې په دې ورستیو کې له ګاونډي هېوادونو ایران او پاکستان څخه زرګونه افغان کډوال مجبور شوي چې خپل هېواد ته ستانه شي. دا جبري ستنېدنې د اقتصادي ستونزو، امنیتي وضعیت او د کډوالو د ملاتړ د نشتوالي له امله ترسره شوي، چې د ستنېدونکو ژوند ته یې ګڼې ننګونې رامنځته کړې دي.
