د ننګرهار حوزوي روغتون کې د یوه ناروغ د مغزي تومور جراحي عملیات په بریالیتوب سره ترسره شول. د ډاکټرانو په وینا، ناروغ تر جراحي درملنې وروسته په بشپړه توګه رغېدلی او روغتیايي وضعیت یې د ډاډ وړ دی.
د ننګرهار ولایت لپاره د طالبانو د رسنیو دفتر د یکشنبې په ورځ (د سلواغې ۱۲مه) د یوې خبرپاڼې په خپرولو سره ویلي، ناروغ د ننګرهار له دره نور ولسوالۍ څخه د بې هوښۍ حالت کې حوزوي روغتون ته انتقال شوی وو او له دقیقو معایناتو وروسته د ناروغ په دماغو کې د یوې غټې توموري دانې(Brain Tumor) تشخيص وشو او دغه وضعیت د ناروغ ژوند ته جدي ګواښ بلل کېده.
د خبرپاڼې لهمخې، د ترینر متخصص ډاکټر حامد شېر شینواري او مسلکي ټیم له لوري د ناروغ بريالي جراحي عمليات (Neurosurgical Operation) ترسره شول او د ډاکټرانو په وينا، ناروغ اوس رغېدلی او روغتیايي وضعیت یې هم د ډاډ وړ دی.
