د طالبانو د کورنیو چارو وزارت د نشهيي توکو پر وړاندې د مبارزې معین د ملګرو ملتونو د نشهيي توکو او جرمونو ادارې له رییس سره کتلي او د کروندګرو لپاره یې د بدیل معیشت او د روږدو کسانو د درمنلې په برخه کې د همکارۍ غوښتنه کړې.
د طالبانو د کورنیو چارو وزارت د یوې خبرپاڼې په خپرولو سره ویلي، چې د یادې ډلې د کورنیو چارو وزارت د نشهيي توکو پر وړاندې د مبارزې معین عبدالرحمان منیر د ملګرو ملتونو د نشهيي توکو او جرمونو ادارې له رییس پولیک اوک سیري او د یادې ادارې سیمهييز رییس اولیور اسولپ سره کتلي دي.
طالبانو د نشهيي توکو پر وړاندې مبارزه د یادې ډلې له لومړیتوبونو بللې او وایي، چې له محدودو امکاناتو سره یې د نشهيي توکو په مخنیوي او د روږدو کسانو په درملنه کې د پام وړ لاسته راوړنې لرلې دي.
طالبانو د ملګرو ملتونو د نشهيي توکو او جرمونو پر وړاندې د مبارزې ادارې له رییس څخه غوښتي، چې له افغان کروندګرو سره د بدیل معیشت او د روږدو کسانو د درملنې او ملاتړ په برخه کې همکاري وکړي.
دا په داسې حال کې ده، چې د ملګرو ملتونو د نشهيي توکو او جرمونو پر وړاندې د مبارزې دفتر (UNODC) په خپل تازه راپور کې ویلي، چې د افغان نارینهوو ترمنځ د چرسو کارونه ۴۷سلنه، د تریاکو ۱۹ سلنه، د ټابلیټ کا ۱۱ سلنه او مېټا مفتامین یا شیشې کارونه اووه سلنې ته رسېږي.
د کندز د امام صاحب والسوالۍ اوسیدونکو له افغانستان انټرنشنل سره د پيښې انځورونه او ویډیوګانې هم شریکې کړې دي.
په دې پیښه کې د یوې کورنۍ دوه وروڼه عبدالولي، محمد ولي او یو د تره زوی بای خان د طالبانو د وسله والو له خوا وژل شوي دي.
دغه کورنۍ وايي، چې په حقوقي موضوع کې د طالبانو وسله والو مداخله کړې او له واک او وسلې څخه په ناوړه ګټې اخیستې یې د دوی د کورنۍ غړي وژلي دي.
دوی د طالبانو مشر ملاهبت الله څخه غواړي، چې د پيښې څیړولو لپاره یو بې پرې پلاوی وټاکي څو دا پيښه په شفاف ډول وڅېړل شي.
د وژل شویو کسانو یو ورور افغانستان انټرنشنل ته وویل، چې دوی نه غوښتل جسدونه خاورو ته وسپاري او د اعتراض په ډول یې جسدونه د کندز ولایت مقام مخې ته وړل خو طالبانو د دوی مخه نیولې ده.
دوی زیاتوي:« اووه کاله یې زموږ مېنه وخوړله اوس مونږ ورته راغلو خو دوی د طالبانو په زور باندې د محاکمو خبره نه منله او ورورڼه یې راته ووژل.»
طالبانو تر اوسه ددې پيښې په اړه څه نه دي ویلي.
په هغو ویډیوګانو کې، چې افغانستان انټرنشنل ته رسېدلې، یوه ډله کسان د درې تنو وژل شویو جسدونو ته فریاد او ژړا کوي.
د پیښې په ځای کې د روغتون امبولانس هم لیدل کېږي.
د کندز ولایت په امام صاحب ولسوالۍ کې ځايي سرچینو افغانستان انټرنشنل ته وویل چې طالبانو د وژل شویو کسانو کورنیو سره ژمنه کړې، چې دوی به هغه طالبان نیسي، چې په دې پېښه کې لاس لري.
دوی زیاتوي تر اوسه پورې طالبانو د خپلو وسله والو د نیولو لپاره عملي اقدام نه دی کړی او دا کسان د طالبانو په لوا کې دنده لري.
