د امریکا او اسراییل جګپوړو جنرالانو له ایران سره د زیاتېدونکو ترینګلتیاوو تر سیوري لاندې خبرې اترې کړې دي. چارواکو د امریکا د ګډو ځواکونو د لوی درستیز جنرال ډان کین او د اسراییل د وسلهوالو ځواکونو د لوی درستیز ایال زمیر ترمنځ د تړلو دروازو تر شا د خبرو جزییات نه دي څرګند کړي.
د رویټرز د راپور له مخې، دوو امریکايي چارواکو د یکشنبې په ورځ د نوم نه ښودلو په شرط دا معلومات ورکړي دي.
دا ناسته تر دې مخکې نه وه راپور شوې.
د اوکراین د دنیپروپېتروفسک ولایت ځایي چارواکي وایي، د روسیې د یوې بېپيلوټه الوتکې په برید کې، چې د مسافرو له یوه بس سره نږدې شوی، لږ تر لږه ۱۲کسان وژل شوي او اووه نور ټپیان دي.
د چارواکو په وینا، دا برید د پاولوهراد ولسوالۍ په یوه ملکي مېشته سیمه کې شوی، ټپیان روغتونونو ته لېږدول شوي او د ځینو روغتیایي وضعیت نازک ښودل شوی دی.
د دنیپروپېتروفسک د ولایتي ادارې مشر اولېکساندر هانژا، ویلي چې برید په څرګند ډول ملکي وګړي په نښه کړي او دا ډول بریدونه د نړیوالو بشري قوانینو ښکاره سرغړونه ده. نوموړي زیاته کړې چې د پېښې په اړه پلټنې روانې دي.
دا برید په داسې حال کې شوی چې په وروستیو اونیو کې روسیې د اوکراین پر ملکي ترانسپورتي لارو خپلو بریدونو ته زور ورکړی دی. تر دې وړاندې هم د اوکراین په بېلابېلو سیمو کې پر مسافر وړونکو بسونو او اورګاډو بریدونه شوي، چې درنې مرګژوبلې یې لرلې دي.
د غزې تړانګې او مصر ترمنځ د رفح دروازه له شاوخوا دوو کلونو وروسته، نن د یکشنبې په ورځ په محدود ډول پرانیستل شوې او یو شمېر فلسطینیان له دې لارې وتلي دي. دا اقدام د امریکا د منځګړیتوب له لارې د اوربند د لومړۍ مرحلې بشپړیدو برخه ګڼل کېږي.
د راپورونو له مخې، دغه پوله په ۱۴۰۳ کال کې د اسراییل له خوا وتړل شوه او تر دې دمه بنده پاتې وه.
د فلسطین د تخنیکي کمېټې مشر، علي شعث په ټولنیزو رسنیو کې ویلي چې دغه پوله به د دوشنبې له ورځې دواړو خواوو ته پرانیستل شي.
ګارډین ورځپانه وایي، چې پر بشري مرستو بار موټرونه له تېرې ورځې څخه د رفح ښار دروازې ته نږدې په کتارونو کې ولاړ وو، چې غزې تړانګې ته له ننوتلو وړاندې د اسراییلي چارواکو له خوا وکتل شي.
اسراییلي امنیتي چارواکو رسنیو ته ویلي چې په ورځنۍ توګه یوازې ۱۵۰ فلسطینیانو ته د وتلو اجازه ورکول کېږي، خو یوازې ۵۰کسانو ته د ننوتلو اجازه شته.
د راپورونو له مخې، د تګ لګښت، اوږدې اداري او امنیتي پروسې د دې سبب شوې چې یوازې محدود شمېر فلسطینیان د رفح له پولې ووځي.
د رفح پولې بشپړ پرانېستل دامریکا د منځګړیتوب له لارې د اوربند د لومړۍ مرحلې برخه ده چې د تلې میاشتې په منځنیو ورځو کې عملي شوې. اسراییل تر هغه د پولې له پرانیستلو ډډه کوله چې ټول ژوندی او وژل شوي یرغمل کسان یې بیرته ورستانه شي.
د هند بهرنیو چارو وزارت د پاکستان هغه څرګندونې چې ګواکې په بلوچستان کې د تېرې ورځې د بریدونو تر شا د نوي ډیلي لاس و، رد کړې او ویې ویل، «دا د پاکستان پخوانۍ تګلاره ده اوغواړي له خپلو کورنیو ناکامیو د خلکو پام واړوي».
د هند د بهرینو چارو وزارت ویاند رندهیر جیسوال له خبریالانو سره په خبرو کې ویلي چې پاکستان باید د تاوتریخوالي له هرې پېښې وروسته د «بېمانا ادعاوو» د تکرار پرځای د خپلو خلکو هغو اوږدمهالو غوښتنو ته پام وکړي چې تر اوسه بېځوابه پاتې دي.
جیسوال همدارنګه زیاته کړې چې د پاکستان د ځپنې، زورواکۍ او د بشري حقونو د سرغړونو سابقه ټولو ته څرګنده ده او نړیواله ټولنه ترې ښه خبره ده.
د هند د بهرنیو چارو وزارت په خپره شوې اعلامیه کې راغلي چې پاکستان بېبنسټه تورونه لګولي، چې په وینا یې اسلاماباد غواړي په دې سره پر خپلو ناکامیو پرده واچوي او د خپل ولس پام پر بله واړوي.
په اعلامیه کې ټینګار شوی چې هند دغه ډول تورونه په بشپړ ډول ردوي او دا یې د واقعیتونو د پټولو هڅه بللې ده.
دا په داسې حال کې ده چې پرون د بلوچستان په ګڼو ښارونو کې د بلوڅ ازادي غوښتونکو له خوا د پاکستان پر امنیتي ادارو او ځواکونو پرله پسې بریدونه وشول.
د پاکستان امنیتي چارواکو ویلي چې په دې بریدونو کې ۱۷ امنیتي کسان او ۳۱ ملکي وګړي وژل شوي دي.
د پاکستان د کورنیو چارو وزیر مُحسن نقوي او د بلوچستان اعلی وزیر سرفراز بګټي په یاد ایالت کې د شنبې ورځې د بریدونو په تړاو له رسنیو سره په خبرو کې ادعا وکړه، چې د یادو بریدونو تر شا د هند لاس دی او ۱۴۵ وسله وال یې وژلي دي.
د امریکا ولسمشر ډونالډ ټرمپ وایي، چې هند به د ایران پر ځای د وینزویلا تیل وپېري. ټرمپ همداراز زیاتوي، چې چین هم کولی شي د وینزویلا د نفتو د پېرودلو لپاره له امریکا سره هوکړې ته ورسېږي.
هغه په دې تړاو چې هند به د وینزویلا تیل وپیري وویل: «موږ دا تړون له مخکې کړی دی.»
د ټرمپ دا څرګندونې یوه ورځ وروسته له هغې شوي، چې د رویټرز خبري اژانس د درېیو باخبره سرچینو له قوله راپور ورکړ، چې امریکا نوي ډهلي ته ویلي ممکن ډېر ژر د روسیې د تیلو د وارداتو د بدیل په توګه، د وینزویلا د نفتو پېرودل بیا پیل کړي.
د امریکا دغه هڅې په داسې حال کې روانې دي، چې واشنګټن د اوکراین پر وړاندې د روسیې د جګړې له امله د دغه هېواد د تیلو عوایدو د کمولو هڅه کوي.
ټرمپ د تېر کال په مارچ میاشت کې د هند په ګډون پر هغو هېوادونو ۲۵ سلنه تعرفه ولګوله، چې له وینزویلا تیل اخلي.
د ونزوېلا لپاره د امریکا لوړ پوړې استازې لورا دوګو د شنبې په ورځ (د سلواغې ۱۱مه) کاراکاس ته ورسېده. دغه سفر د دوه اړخیزو اړیکو د بیا پیل او د سیاسي او اقتصادي اختلافونو د حل په موخه د هڅو په چوکاټ کې ترسره کېږي.
د ونزوېلا د بهرنیو چارو وزیر اېوان ګېل په خپل ټېلګرام کانال کې د یوه یادښت په خپرولو سره ویلي، دغه سفر «د دوه اړخیزو مسایلو په اړه د لارې نقشې د جوړېدو» او «د ډيپلوماټيکو خبرو له لارې د متقابل درک او نړۍوالو قوانینو پر بنسټ د اختلافونو د حل» په موخه ترسره شوی دی.
لورا دوګو تر دې مخکې په هندوراس او نیکاراګوا کې د امریکا د سفیرې په توګه هم کار کړی دی. هغې هم په خپله اېکس پاڼه لیکلي، ونزوېلا ته رسېدلې او له خپل ټيم سره همکاریو ته چمتو ده.
د واشنګټن او کاراکاس اړیکې په ۲۰۱۹ کال کې د پخواني ولسمشر نیکولاس مادورو د کړنو له امله پرې شوې. امریکا د روان کال د مرغومي په ۱۴مه د دغه هېواد پخوانی ولسمشر نیکولاس مادورو ونیو او د محاکمې لپاره یې نیویارک ته ولېږداوه.
مادورو د نشهيي توکو د قاچاق او ترهګرۍ اړوندو مسایلو تورن شوی دی.
د ونزوېلا لنډ مهالې ولسمشرې دلسای رودریګز ویلي، دغه هېواد له امریکا سره «د متوازن او د متقابل درناوي پر بنسټ د نړۍوالو اړیکو پر لور د حرکت په لټه کې دی».
د یادونې وړ ده، چې دواړه هېوادونه امریکا ته د دوه میلیارده ډالرو په ارزښت د ونزوېلا د اومه نفت پر صادرېدو سلا کړې ده.