د هلمند لپاره د طالبانو امنیتي مسوولین وايي، د دغه ولایت په سنګین ولسوالۍ کې یې دوه کسان د اختطاف کوونکو له منګولو ژغورلي دي. د دوی په وینا، ۵ اختطاف کوونکي یې هم په تړاو نیول شوي دي.
د هلمند ولایت لپاره د طالبانو د رسنیو دفتر د یکشنبې په ورځ (د سلواغې ۱۲مه) د یوې خبرپاڼې په خپرولو سره ویلي، اختطاف کوونکو څه موده مخکې یاد دوه کسان له لښکرګاه ښار څخه اختطاف کړي وو او بیا یې په سنګین ولسوالۍ کې ساتل.
د خبرپاڼې لهمخې، اختطاف کوونکو د یادو کسانو د ازادولو لپاره د هغوی له کورنیو د ۱۰ میلیونه افغانیو غوښتنه کړې وه، خو بالاخره نن د یو لړ عملیاتو په پایله کې د اختطاف کوونکو له منګلو وژغورل شول.
په خبرپاڼه کې راغلي، په دې عملیاتو کې ۵ اختطاف کوونکي له یوه ټوپک او یوه موټر سره یو ځای نیول شوي دي.
ویل کېږي، چې یاد کسان بېرته خپلو کورنیو ته سپارل شوي او له اختطاف کوونکو لا هم پوښتنې او ګروېږنې روانې دي.
