امریکایي سناتور لینډسي ګراهام له فاکسنیوز سره په خبرو کې ویلي، په منځني ختیځ کې واقعي سوله هغه وخت پیلېږي چې د ایران رژیم نسکور شي. هغه په ایران کې روانو اعتراضونو ته په اشارې سره زیاته کړې، چې د ایران خلک د غوره ژوند لپاره سړکونو ته راوتلي او د نړۍوالې ټولنې د ملاتړ مستحق دي.
ګراهام ټینګار وکړ، چې د ایران د رژیم نسکورېدل به د هغو ترهګرو ډلو د کمزوري کېدو په معنا هم وي، چې ایران یې ملاتړ کوي. نوموړي وویل، د امریکا له ولسمشر پرته بل هېڅوک د سولې د بهیر د پرمخ بېولو دومره وړتیا نه لري. هغه خبرداری ورکړ، چې د ایراني ښځو او نارینهوو له زړورتیا څخه باید په بېتفاوتۍ تېر نهشو او څرګنده یې کړه، چې د ایتاللهخېلو حکومت به هېڅکله د امریکا ملګری یا شریک پاتې نهشي.
د هغه په وینا، ډونالډ ټرمپ د دغه هېواد د ځپونکي حکومت پر ځای د ایران خلکو ته د لومړیتوب په ورکولو سره سمه لاره غوره کړې ده.
ګراهام اسلامي جمهوري د سیمې د ملیشو ملاتړی وباله او ویې ویل، چې که دا رژیم لهمنځه لاړ شي، حزبالله، حوثیان او نورې وسلهوالې ډلې به هم لهمنځه ولاړې شي.
