په پاکستان کې د امریکا سفارت د بلوچستان په ایالت کې پر امنیتي ځواکونو د بریدونو په کلکه غندنه وکړه. دغه بریدونه د بلوچستان د بېلتونپالو لخوا ترسره شوي چې دغه ډله د امریکا لخوا د ترهګریز سازمان په توګه پیژندل کیږي.
په اسلام اباد کې سفارت لخوا په اکیس خپره شوې خبرپاڼه کې د امریکا سفارت شارژدافیرناتالي بیکر له قوله راغلي: «موږ د دې خونړیو پېښو قربانیانو، د هغوی کورنیو او ټولو اغېزمنو کسانو ته خپله ژوره خواشیني او تسلیت وړاندې کوو.»
نوموړې ټينګار کړی چې د پاکستان خلک د تاوتریخوالي او وېرې پرته د ژوند کولو حق لري او د امریکا متحده ایالات د پاکستان د سولې او ثبات د ټینګولو په هڅو کې ثابت قدم شریک دی.
بیکر زیاته کړې: «په دې ستونزمن وخت کې موږ له پاکستان سره ولاړ یو او د خلکو د خونديتوب او سوکالۍ لپاره خپل ملاتړ څرګندوو.»
