یو مخکښ جمهوريپال امریکايي سناتور له ډونالډ ټرمپ غوښتي، چې له تهران سره د خبرو اترو پر ځای د ایران حکومت د نسکورولو هڅه وکړي. لېنډسي ګراهام ویلي:« په منځني ختیځ کې ریښتینې سوله هغه وخت راتلای شي، چې د ایران رژیم سقوط وکړي».
ګراهام له ټرمپ غوښتي، چې د ایراني لاریون کوونکو د ملاتړ لپاره پر خپلې ژمنې عمل وکړي. لېنډسي ګراهام له فاکس نیوز سره په مرکه کې د امریکا د پخوانیو ولسمشرانو، رونالډ رېګن او بارک اوباما د سیاستونو یادونه وکړه او ټینګار یې وکړ، چې له ټرمپ څخه بل هېڅوک د سولې د بهیر پرمخ وړلو دومره وړتیا نهلري.
دغه لوړپوړی جمهوريپال سناتور په دې باور دی، چې د ایران حکومت سقوط به د دغه هېواد ملاتړې ترهګرې ډلې هم کمزورې کړي. هغه ټینګار وکړ: «د ایتالله خامنهیي په څېر حکومت به هېڅکله د امریکا شریک یا دوست نه وي».
د هغه په وینا:« ډونالډ ټرمپ د دغه ظالمانه حکومت پر ځای د ایران د خلکو په غوره کولو سره سمه لاره غوره کړې ده». ګراهام ایران د سیمې د وسلهوالو ډلو ملاتړی وباله او ویې ویل، که دغه رژیم لهمنځه ولاړ شي؛ نو حزبالله، حوثیان او نورې وسلهوالې ډلې به هم لهمنځه ولاړې شي.
