د ۱۹ کلنو ملي لوبډله به په نیمه پایلوبه کې د هند له لوبډلې سره د سیالۍ ډګر ته ښکته شي
د ۲۰۲۶ کال د ۱۹ کلنو کرېکټ نړۍوال جام کې د افغانستان د ۱۹ کلنو کمعمره ملي لوبډله د هند د کرېکټ لوبډلې پر وړاندې لوبېږي.
د هند د ۱۹ کلنو ملي لوبډلې د پاکستان لوبډلې ته ماتې ورکړه او د نړۍوال جام په نیمه پایلوبه کې به افغان ملي لوبدله د هند د ملي لوبډلې پروړاندې د سیالۍ ډګر ته ښکته شي.
د ۲۰۲۶ کال د ۱۹ کلنو کرېکټ نړۍوال جام نیمه پایلوبې ته افغانستان، اسټرالیا، هند او انګلنډ لوبډلو لاره موندلې ده.
د نړۍوال جام د نیمه پایلوبې سیالۍ د سېشنبې او چهارشنبې په ورځو ترسره کېږي.
په نیمه پایلوبه کې د سېشنبې په ورځ د اسټرالیا او انګلنډ د ۱۹ کلنو لوبډلو ترمنځ او د چهارشنبې په ورځ بیا افغانستان د هند د ملي لوبډلې پروړاندې سیالي ترسره کوي.
که هره لوبډله خپله لوبه وګټي، نو مستقیم به پایلوبې ته ووځي.
د یادونې وړ ده، چې دا دریېم ځل دی چې افغانستان د ۱۹ کلنو کرېکټ نړۍوال جام ګټلو په موخه نیمه پایلوبې ته لاره پیدا کوي، خو تر اوسه افغانستان دغه جام نهدی ګټلی.
