طالبانو په کابل او فاریاب کې په یوه ورځ ۴۰ کسان په دُرو وهلي دي
د طالبانو ستره محکمه وایي چې نن دوشنبه د سلواغې په ۱۳ مه نېټه یې په کابل او فاریاب ولایتونو کې د بېلابېلو جرمونو په تور پر ۴۰ کسانو په عام محضر کې د دُرو وهلو سزاوې عملي کړې دي.
د دې محکمې له خوا په خپره شوې خبرپاڼه کې راغلي، چې یاد کسان د بېلابېلو جرمونو په تور، د بند له سزاوو سره یو ځای، په دُرو وهل شوي دي. د خبرپاڼې له مخې، یوازې په کابل ولایت کې ۳۷تنه او په فاریاب ولایت کې درې تنه په عام محضر کې مجازات شوي دي.
طالبانو ویلي چې دغه کسان د زنا، د مسکراتو د استعمال او «اخلاقي فساد» په تورونو محکوم شوي وو.
د طالبانو د سترې محکمې په وینا، پر یادو کسانو له درې میاشتو تر دوو کلونو پورې د بند سزاوې او له ۱۵تر ۳۹دُرو د وهلو حکمونه تطبیق شوي دي.
طالبان ټینګار کوي چې دا سزاوې د دوی د قضایي پرېکړو له مخې او د شریعت د تطبیق په چوکاټ کې عملي شوې دي. خو د بشري حقونو بنسټونه او نړیوالې ادارې دا د بشري حقونو سرغړونه بولي او له طالبانو یې د دې کړنو د بندولو غوښتنه کړې ده.
