یو اسراییلي امنیتي چارواکي ویلي، چې د غزې او مصر ترمنځ د رفح مهمه لاره د دوشنبې په ورځ د یادې سیمې د اوسېدونکو د تګراتګ لپاره په بشپړه توګه پرانیستل شوه. نوموړي زیاته کړې، چې دغه لاره هره ورځ د شپږو ساعتونو لپاره پرانیستې وي.
نوموړي د اروپايي ټولنې د سرحدي مرستې د ماموریت (EUBAM) د ټیمونو له رسېدو وروسته وویل: «له دې شېبې وروسته رفح بندر د خلکو د تګراتګ لپاره هم د داخلېدو او هم د وتلو په موخه پرانیستل شوی دی».
د اسراییل دولتي ټلویزیون «کان» راپور ورکړی، تمه ده چې شاوخوا ۱۵۰ کسان د دوشنبې په ورځ له غزې مصر ته ولاړ شي، چې پهکې ۵۰ ناروغان هم شامل دي او نږدې ۵۰ نور کسان به بېرته غزې ته داخل شي.
د فرانس پرېس خپرو شوو انځورونو ښودلې، چې د یکشنبې په ورځ د مصر پر لوري امبولانسونه کتار ولاړ وو؛ څو ناروغان انتقال کړي. د غزې د روغتیا وزارت یوه چارواکي چې د حماس تر ادارې لاندې فعالیت کوي وویل، شاوخوا ۲۰۰ ناروغان د وتلو اجازې ته په تمه دي.
رفح د غزې لپاره د مرستو د داخلېدو یو مهمه دروازه بلل کېږي، هغه سیمه چې د اوربند له پلي کېدو سره، سره لا هم له سختو بشري ستونزو سره مخ ده. دغه اوربند تېر کال د اکتوبر له ۱۰مې راهیسې ټینګ شوی دی.
دغه بندر له هغه وخته تړل شوی و، چې اسراییلي ځواکونو د ۲۰۲۴کال په مئ میاشت کې د حماس پر وړاندې د جګړې پر مهال کنټرول ترلاسه کړ. د اسراییل دفاع وزارت اړوند ادارې «کوګات» یوازې د اشخاصو د تګ راتګ یادونه کړې او د مرستو د پراخه داخلېدو په اړه یې څه نهدي ویلي.
