د قزاقستان ولسمشر په دوه ورځني رسمي سفر سبا پاکستان ته ځي
د قزاقستان ولسمشر قاسمجومارت توکایف په دوه ورځني رسمي سفر سبا پاکستان ته ځي. نوموړی به د دغه سفر په ترڅ کې د پاکستان له ولسمشر او لومړي وزیر سره وګوري او د پاکستان-قزاقستان سوداګریز فورم ته به وینا وکړي.
د پاکستان د بهرنیو چارو وزارت په خبرپاڼه کې راغلي، چې توکایف د پاکستان د لومړي وزیر شهباز شریف په بلنه دغه هېواد ته سفر کوي او ورسره به د کابینې لوړپوړي وزیران او نور لوړپوړي چارواکي هم مل وي.
په خبرپاڼه کې راغلي، چې د دغه سفر موخه د دوه اړخیزو اړیکو هراړخیزه بیاکتنه او د سوداګرۍ، ترانزیت او د خلکو ترمنځ د اړیکو د پراختیا نوې لارې چارې لټول دي.
