د طالبانو د کورنیو چارو وزارت وایي، چې په ۷ ولایتونو کې یې د بېلابېلو عملیاتو پر مهال ۲۲ تنه د «غلا، قتل، شرابو، اخلاقي فساد او د وسلو د ناقانونه لېږد» په تور نیولي دي. د دغه وزارت په وینا؛ نیول شوي کسان به تر لومړنیو پلټنو وروسته عدلي او قضايي ادارو ته ور وپېژني.
د طالبانو یاد وزارت د دوشنبې په ورځ (د سلواغې ۱۳مه) ویلي، چې د غور په مرکز کې یې پر یوه کور د عملیاتو پر مهال درې تنه د ۵۰۰زره افغانیو او د دوه مېلیونو په ارزښت د غلا شویو سروزرو سره نیولي.
دغه وزارت زیاته کړې، چې «د جوزجان په فیضاباد ولسوالۍ کې درې تنه بیا د قتل، په هرات او غزني کې یې دوه، دوه کسان د غلا په تور، په سرپل کې دوه تنه د وژنې او دوه تنه یې په جوزجان کې د اخلاقيٍ په فساد په تور نیولي دي».
د طالبانو کورنیو چارو وزارت وایي، په پکتیا کې یې دوه تنه له یو میل کلاشینکوف، ۴ شاجورونو، مرمیو، لاسي بمونو او نور مهماتو سره نیولي چې غوښتل یې نورو سیمو ته یې په ناقانونه توګه انتقال کړي.
دغه وزارت په یوې جلا خبرپاڼه کې لیکلي، چې په فراه ولایت کې یې ۶ تنه د ۷۱ لېټرو شرابو سره نیولي. د طالبانو په خبره؛ نیول شوي کسان به تر لومړنیو څېړونو او پوښتنو وروسته عدلي او قضايي ادارو ته ور وپېژندل شي.
