د ۲۰۲۶کال نړۍوال جام چمتووالي سیالۍ؛ افغانستان نن د سکاټلنډ پر وړاندې لوبه کوي
د ۲۰۲۶کال نړۍوال شل اوریز جام چمتووالي سیالۍ په لړ کې د افغانستان کرېکټ ملي لوبډله نن د سکاټلنډ پر وړاندې خپله لومړنۍ تمریناتي لوبه کوي. دغه لوبه به نن ماسپښین ۲ بجې په بېنګلور کې پیل شي.
د افغانستان کرېکټ بورډ د معلوماتو له مخې؛ دغه سیالي د تمریناتي لوبو د لړۍ برخه ده، چې موخه یې د لوبغاړو تخنیکي چمتووالی، د لوبډلې همغږي او د راتلونکو نړۍوالو سیالیو لپاره غوره ترکیب موندل دي.
تمه کېږي، چې افغان لوبډله به په دې لوبه کې بېلابېل لوبغاړي وازمويي. د کرېکټ شنونکي وایي، دغه ډول تمریناتي لوبې د نړۍوال جام له مهمو سیالیو مخکې د لوبډلو لپاره حیاتي ارزښت لري او کولای شي د ټیم پر کړنو مثبت اغېز ولري.
