په کندهار کې د طالبانو د کرنې، اوبو لګولو او مالدارۍ ریاست وایي، چې د ۱۴۰۴کال په لړ کې د دغه ولایت ریحان، د لوګر سنځلي، د خوست مرویزه، بامیان خارکاناډايي او د میدان وردګو شین شوبي ۷۹ ټنه شات پلورل شوي دي. دغه ریاست ویلي، چې په همدې کال کې په کندهار کې ۵۶ ټنه شات تولید شوي دي.
د طالبانو یاد ریاست د دوشنبې په ورځ (د سلواغې ۱۳مه) په یوې خبرپاڼه کې ویلي، چې په پلورل شویو شاتو کې د مصر د سیاهدانې شات هم شامل دي. په کندهار کې د طالبانو د کرنې او مالدارۍ ریاست ویاند محمد حنیف حقمل زیاته کړې، چې په دغه ولایت کې د شاتو فارمونه ورځ تر بلې زیاتېږي.
هغه وایي:« په کندهار کې د شاتو فارمونو پراخوالی ورځ تر بلې زیاتېږي او هڅه کېږي، چې د شاتو په تولید او صادراتو کې بدلون راشي». د نوموړي په خبره؛ د همدې کال د پسرلي او دوبي په موسمونو کې په کندهار کې ټول ټال ۵۶ ټنه شات تولید شوي، چې له دې ډلې ۲.۵ ټنه بهرنیو هېوادونو ته هم صادر شوي دي.
د طالبانو د کرنې، اوبو لګولو او مالدارۍ وزارت خبر ورکړی، چې د هېواد په کچه د شاتو مچیو د روزنې او د شاتو د تولید لپاره تر ۳۰زره ډېر فارمونه جوړ شوي.
