د بریتانیا د لومړي وزیر د دفتر رييس مورګان مکسوییني د یکشنبې په ورځ (د سلواغې ۱۹مه) په واشنګټن کې د بریتانیا د سفیر په توګه د پیټر مندلسون له انتصاب کېدو د ملاتړ له امله له خپلې دندې لاس په سر شو.
د هغه استعفا وروسته له هغې ده، چې د روان کال په وږي میاشت کې مندلسون د بد نامه امریکايي پانګوال جېفري اپسټین په دوسیه کې د ښکېلتیا له امله له خپلې دندې ګوښه شو.
۴۸ کلن سیاستوال مکسوییني چې واک ته د کېېر استارمر په رسېدو کې مهم نقش درلود په یوې اعلامیه کې ویلي: «د پيټر مندلسون انتصاب یوه تېروتنه وه. هغه زموږ ګوند، هېواد او پر سیاست اعتماد ته زیان رسولی دی». هغه زیاته کړې: «کله چې له ما نظر وغوښتل شو، لومړي وزیر ته مې سپارښتنه وکړه، چې دغه چاره ترسره کړي او اوس د یادې سپارښتنې ټول مسوولیت منم».
د ځانساتي یا محافظه کاره ګوند مشر کمي بیدناک بیا ویلي، دغه چاره ډېر په ځنډ سره شوې او استارمر باید د «ناورین زېږوونکو» پرېکړو مسوولیت ومني. ښي اړخي افراطي «اصلاحاتو» ګوند مشر نایجل فراژ هم ویلي، د کېېر استارمر دوران به ډېر ژر پایته ورسېږي.
د ترسره شویو نظر پوښتنو پر بنسټ، د رای ورکوونکو په منځ کې د کېېر استارمر محبوبیت مخ په راکمېدو دی. لا تر اوسه روښانه نهده، چې د مک سوییني استعفا به د هغه د منتقدینو لپاره کافي وي که څنګه؟
مورګان مکسوییني د ۲۰۲۴ کال له اکټوبر میاشتې راهیسې د بریتانیا د لومړي وزیر د دفتر رييس وو. لا تر اوسه مشخصه شوې نهده چې ځای ناستی به یې څوک وي.
د اپسټین قضیې اړوند د اسنادو په بربنډېدو سره رسنیو د پيټر مندلسون برېښنالیکونه خپاره کړي چې پر بنسټ یې، هغه د اپسټين قضیې ته د رسېدنې په جریان کې په ۲۰۰۸ کال کې د هغه لومړنی محکومیت «ناسم» بللی وو او سپارښتنه یې کړه وه، چې د هغه د ازادېدو لپاره باید په بېړه حقوقي اقدامات وشي.
د امریکا د عدلیې وزارت له لوري په خپرو شویو اسنادو کې لیدل کېږي، چې مندلسون د خپلو لومړنیو خبرو پر خلاف، له ډېر وخت راهیسې له یاد بدنامه مجرم سره په اړیکه کې وو.
