په کابل کې سرچینو افغانستان انټرنشنل ته وویل، چې طالبان د افغانستان پخواني ولسمشر حامد کرزي او د ملي پخلاینې شورا مخکیني مشر عبدالله عبدالله ته له افغانستان څخه د شوروي ځواکونو د وتلو د کلیزې په مناسبت د سلواغې د ۲۶مې د نمانځلو اجازه نه ورکوي.
په کابل کې باخبره سرچینو وویل، چې د طالبانو له بیاځلي واک ته رسېدو راپه دې خوا هیڅ کله هم دغو مشرانو ته د ځانګړو ورځو د نمانځلو مراسمو کې د ګډون بلنه ده ورکړې.
دوی همدراز وویل، چې حامد کرزی او یا هم عبدالله عبدالله د ځانګړو ورځو د نمانځلو لپاره د غونډو جوړولو اجازه هم نه لري او دا پر دوی د طالبانو د محدودیتونو یوه برخه ده.
له وړاندې سرچینو افغانستان انټرنشنل ته ویلي، چې کرزی او عبدالله د طالبانو له اجازې پرته نشي کولی، چې لیدنې وکړي او یا هم سفرونه ترسره کړي او دوی اړ دي په دې دواړو موضوعاتو کې لومړی له طالبانو اجازه واخلي.
د روان کال په وږي میاشت کې سرچینو ویلي و، پخواني ولسمشر څو ځله له طالبانو غوښتنه کړې چې خپل ټاټوبي کندهار ته د سفر اجازه ورکړي، خو طالبانو د دې لیدنو لپاره ځانګړي شرایط ټاکلي دي.
د طالبانو دا چلند ښيي چې د دوی په څرګندونو او عمل کې زیات توپیرونه لیدل کېږي.
د طالبانو د دفاع وزیر یعقوب مجاهد له افغانستان څخه د شوروي ځواکونو د وتلو د کلیزې په مناسبت د سلواغې د ۲۶مې په مراسمو کې وویل چې « تېر به هېروئ، د اینده فکر به کوئ، دا فکر به نه کوئ، چې دا په هغه تنظیم کې و او دا په هغه تنظیم کې. دا فکر به نه کوئ، چې دا له دې ډلې سره تړلی و او دا له هغې ډلې سره تړلی و».
نوموړي دغه راز وویل، « دا فکر به له ذهنه باسئ چې دغه سړي پخوا زما په مقابل کې دا خبرې کولې او یا یې دا اعمال کول، نو لهذا نن د انتقام ورځ ده او زه به خپل انتقام ورنه اخلم».
