نیویارک ټایمز د امریکايي چارواکو له قوله راپور ورکړی، ډونالډ ټرمپ خپلو سلاکارانو ته ویلي چې که مذاکرات یا لومړنی هدفي برید ایران د امریکا غوښتنو منلو ته اړ نهکړي، نو په راتلونکو میاشتو کې به د ایران د مشرانو له واکه د لرې کولو په موخه پر دغه هېواد خورا لوی برید په پام کې ونیسي.
ټاکل شوې، چې امریکا او ایران به د پنجشنبې په ورځ په جنیوا کې درېیم پړاو اټومي مذاکرات پیل کړي او داسې ښکاري، چې دا به پر ایران د پوځي اقدام د مخنیوي لپاره د مذاکراتو وروستی پړاو وي.
خو نیویارک ټایمز په خپل راپور کې ویلي، چې ټرمپ د مذاکراتو د ناکامۍ په صورت کې د ایران پروړاندې د اقداماتو پر انتخابونو غور کوي.
د ټرمپ سلاکارانو ویلي، چې نوموړي په راتلونکو ورځو کې پر ایران د یوه لومړني برید ترسره کولو ته لېوالتیا ښودلې، ترڅو د ایران مشران پوه کړي چې د اټومي وسلو له جوړولو لاس پر سر شي، خو په دې اړه لا هم وروستۍ پرېکړه نه ده شوې.
د راپورونو له مخې، په پام کې نیول شویو هدفونو کې د سپاه پاسداران له مرکزي دفتره نیولې د ایران تر اټومي مرکزونو او د بالسټیک توغندیو تر پروګرام پورې ټول شامل دي.
د نیویارک ټایمز په راپور کې راغلي، چې ډونالډ ټرمپ خپلو سلاکارانو ته ویلي چې که په یادو ګامونو هم تهران د هغه غوښتې ونهمني، نو په روان کال کې به د علي خامنهيي د راپرځولو لپاره د پوځي برید امکان هم په پام کې ونیسي.
