یونېسف: د اوکراین د جګړې له پیل راهیسې ۲،۵ میلیونه ماشومان له خپلو کورونو بېځایه شوي دي
د ملګرو ملتونو د ماشومانو د ملاتړ وجهي صندوق (یونېسف) د بېځایه شویو اوکرایني ماشومانو په اړه ژوره اندېښه ښودلې او وايي، چې پر اوکراین د روسیې له برید راهیسې ۲،۵ میلیونه اوکرایني ماشومان له خپلو کورونو څخه بېځایه شوي دي.
یونېسف پر اوکراین د روسیې د برید د څلورو کلونو د پوره کېدو په درشل کې د یوې اعلامیې په خپرولو سره د جګړې له امله د بېځایه شویو ماشومانو په اړه ژوره اندېښنه ښودلې ده.
د یاد سازمان په اعلامیه کې راغلي: «د اوکراین د جګړې له پیل څخه څلور کاله تېرېږي، خو لا هم له ۲،۵ میلیونو څخه ډېر ماشومان بېځایه شوي دي چې ډېری یې څو ځلې تېښتې ته اړ شوي دي».
یونېسف ویلي، چې د جګړې له امله ځپل شوي ماشومان چې په اوکراین او ګاونډیو هېوادونو کې مېشت دي، روغتیايي، خوراکي او تعلیمي مرستې رسوي.
د ملګرو ملتونو یادې ادارې یوځل بیا غږ کړی، چې د جګړې اړخونه دې د ملکیانو او په ځانګړې توګه د ماشومانو ژوند ته ډېره پاملرنه وکړي.
