پر ایران له احتمالي برید وړاندې د پنجشنبې ورځې مذاکرات د تهران لپاره وروستی چانس دی
اکسیوس د امریکایي چارواکو له قوله راپور ورکړی، چې د مذاکراتو اوسنۍ هڅه د واشنګټن د پراخو پوځي عملیاتو له پیلېدو وړاندې د ټرمپ له حکومت سره د هوکړې لپاره د ایران وروستی فرصت دی؛ هغه عملیات چې ښايي علي خامنهيي په نښه کړي.
ټاکل شوې ده، چې د مذاکراتو نوی پړاو راتلونکې پنجشنبې په جنیوا کې پیل شي.
د اکسیوس د راپور پر بنسټ، یوه جګپوړي امریکایي چارواکي د یکشنبې په ورځ (د کب ۳مه) ویلي، که چیرې ایران په راتلونکو ۴۸ ساعتونو کې یو دقیق وړاندیز وړاندې کړي، امریکایي مذاکره کوونکي چمتو دي چې د پنجشنبې په ورځ په جنیوا کې د خبرو اترو نوی پړاو پیل کړي. هغه ټینګار وکړ، چې د ټرمپ اداره د تهران د وړاندیز شوې طرحې په تمه ده.
په راپور کې همداراز راغلي، سټیو وېټکاف او جرډ کوشنر چې ډونالډ ټرمپ ته سپارښتنه کړې، ترڅو د برید د حکم له صادرېدو وړاندې ډیپلوماسۍ ته فرصت ورکړي، هوډ لري چې که تهران خپل وړاندیز واستوي، د کب په ۷مه به جنیوا کې حضور ولري.
دغه امریکایي چارواکي زیاته کړې، چې دواړه لوري ښايي له هر اړخیزې اټومي هوکړې مخکې د یوې لنډمهالې هوکړې په اړه هم مذاکره وکړي.
