په مکسیکو کې د نشهيي توکو یو لوی کاروباري المنچو وژل شوی
د مکسیکو چارواکي وايي، د نشهيي توکو یو لوی کاروباري «نیمیسیو اوسېګیرا» چې په «المنچو» مشهور وو، په یوه پوځي عملیاتو کې ووژل شو. مکسیکو د امریکا د احتمالي مداخلې له ګواښونو وروسته د نشهيي توکو پر کاروبریانو فشار زیات کړی دی.
د مکسیکو دفاع وزارت ويلي، د مکسیکو په لوېدیځ ایالت جالیسکو کې د یکشنبې په ورځ (د کب ۳مه) د نشهيي توکو یاد کاروباري لومړی په یوې نښته کې ټپي او وروسته مکسیکو ښار ته د هوايي انتقال پر مهال ومړ.
دغه وزارت ویلي، د یاد کس د نیولو لپاره امریکا ورسره معلومات شریک کړي وو. له دغو عملیاتو وروسته تاوتریخوالی راوپارېده او په څو ایالتونو کې لویې لارې وتړل شوې او یو شمېر موټر هم وسوځول شول.
د امریکا د بهرنیو چارو وزارت مرستیال کریسټوفر لېنډاو د اوسېګیرا وژل کېدل د امریکا او مکسیکو لپاره لوی پرمختګ بللی دی.
د نشهيي توکو دغه لوی کاروباري «نیمیسیو اوسېګیرا» چې په «المنچو» مشهور وو، پخوا د پولیسو افسر وو.
