د وچکالۍ اندېښنه؛ ملګرو ملتونو د کرنیزو سیمو د رطوبت کمېدو خبرداری ورکړی
د ملګرو ملتونو د خوړو او کرنې سازمان (ایف ای او) وړاندوینه کړې چې په راتلونکې یوه اونۍ کې به د افغانستان په ډېرو سیمو کې هوا وچه وي او یوازې په شمال او شمالختیزو ځینو برخو کې د لږ ورښت اټکل کېږي.
دغه سازمان نن دوشنبه د کب په ۴ مه نېټه، ویلي چې د فبرورۍ له ۲۳مې تر د مارچ لومړۍ نېټې پورې به د افغانستان په بېلابېلو سیمو کې د تودوخې درجه د ۰.۲۵ او ۴سانتيګرادو ترمنځ وي.
د ملګرو ملتونو د خوړو او کرنې سازمان زیاته کړې، چې د هېواد په ډېری سیمو کې به د ورښت کچه له منځنۍ کچې څخه هم ټیټه وي.
د «ایف ای او» په وینا، له نورمال کچې څخه لوړه تودوخه به د پسرلي په وروستیو کې د کرنیزو ځمکو د خړوبولو لپاره د واورې زیرمې هم راکمې کړي.
ایف ای او خبرداری ورکړی چې د هېواد په شمالختیځ، ختیزو او مرکزي لوړو سیمو کې د شپې له خوا ټیټه تودوخه په دغو سیمو کې د کنګل او یخنۍ ګواښ زیاتولی شي.
دغه سازمان د وچې هوا د دوام په اړه اندېښنه ښودلې او ویلي یې دي چې دا وضعیت به د هېواد په شمالي للمي کرنیز کمربند کې د رطوبت د کمښت ګواښ هم لوړ کړي.
دا په داسې حال کې ده چې ملګري ملتونو تر دې وړاندې د افغانستان په لوېدیځو او جنوبي ولایتونو کې د ناڅاپي سېلابونو د ګواښ د زیاتوالي خبر ورکړی و او ویلي یې وو چې درانده ورښتونه له لوړې تودوخې سره یوځای کولی شي په دغو سیمو کې د سېلابونو د راوتلو احتمال زیات کړي.
