شهباز شریف د قطر امیر په بلنه په دوه ورځني سفر دوحې ته ځي
د پاکستان د بهرنیو چارو وزارت وایي، ددغه هېواد لومړی وزیر شهباز شریف به د فبرورۍ له ۲۳مې تر ۲۴مې نېټې پورې قطر ته رسمي سفر وکړي. د یاد وزارت په وینا، په دغه سفر کې به د سوداګرۍ، پانګونې، انرژۍ، د بنسټیزو پروژو پراختیا او د کاري ځواک د لېږلو په برخه کې تړونونه وشی.
د پاکستان د بهرنیو چارو وزارت وايي، چې په دې سفر کې به شهباز شریف د قطر له امیر تمیم بن حمد آل ثاني سره وګوري.
د پاکستان د بهرنیو چارو وزارت په اعلامیه کې راغلي، چې دا سفر د قطر د امیر په بلنه کېږي.
له شهباز شریف سره په دې سفر کې د پاکستان د بهرنیو چارو وزیر اسحاق ډار او نور وزیران ملتیا کوي.
قطر هغه هېواد دی، چې د طالبانو او پاکستان ترمنځ وروستيو کړکېچونو پر مهال یې د اوربند په برخه کې مهم رول درلود خو اوس یو ځل بیا دا اوربند مات شوی دی او پاکستان دوه شپې وړاندې په پکتیکا او ننګرهار ولایتونو کې هوايي بریدونه ورکړل.
