شهباز شریف د قطر امیر په بلنه په دوه ورځني سفر دوحې ته ځي

زېلېنسکي ټینګار کړی، چې موخه یې د روسیې د بریا مخنیوی نه‌؛ بلکې پر خلکو د روسیې د غوښتنو تپل او د خپل ژوند د بڼې بدلولو ته د هغوی اړ اېستل دي. د اوکراین ولسمشر ولادیمیر زېلېنسکي پر اېکس پاڼه په خپل یادښت کې څرګنده کړې، چې د روسیې ولسمشر ولادیمیر پوتین په عملي توګه د درېیمې نړۍوالې جګړې پیل کړی دی.

هغه لیکلي: «پوښتنه دا ده، چې هغه څومره ځمکه نیولی شي او څنګه یې مخه ونیسو؟ نه د دې لپاره چې روسیه بریالۍ نه‌شي؛ بلکې د دې لپاره چې روسیه غواړي خپلې غوښتنې په خلکو وتپي او د خلکو ژوند داسې بدل کړي، چې د هغوی په خوښه نه‌وي».

زېلېنسکي ټینګار کړی: «زه باور لرم، چې پوتین لا دمخه جګړه پیل کړې او موږ د دې هڅه کوو، چې دغه جګړه پراخه او نړۍواله نه‌شي. نن ورځ موږ د هغه د پرمختګ مخنیوي لومړۍ کرښه یو».
دغه څرګندونې داسې مهال دي، چې د روسیې او اوکراین ترمنځ جګړه لا هم روانه ده او نړۍواله ټولنه د دواړه خواوو د کړنو په اړه اندېښنې څرګندوي.

ټاکل شوې، چې د خبرو نوی پړاو پنجشنبه (د کب په ۷مه) په جېنوا کې ترسره شي. د راپور له مخې؛ یوه لوړپوړي امریکايي چارواکي (د حوت په ۳مه) ویلي، که ایران په راتلونکو ۴۸ ساعتونو کې روښانه او مشخص وړاندیز وړاندې کړي؛ نو امریکايي مذاکره کوونکي چمتو دي چې د پنجشنبې په ورځ په جېنوا کې نوې خبرې پيل کړي.

نوموړي ټینګار کړی، چې د ټرمپ اداره د تهران د وړاندیز مسودې ته په تمه ده. راپور زیاتوي، سټیو وېټکاف او جرد کوشنر چې ډونالډ ټرمپ ته یې د پوځي برید له امر مخکې د ډیپلوماسۍ د فرصت ورکولو سپارښتنه کړې؛ په پام کې لري چې د ایران له لوري د وړاندیز د لېږلو په صورت کې (د حوت په ۷مه) جېنوا ته ولاړ شي.

دغه امریکايي چارواکي دا هم ویلي، چې دواړه لوري ښايي د هر اړخیز اټومي تړون تر لاسلیک مخکې د یوې لنډمهاله هوکړې پر سر خبرې وکړي.

د روسیې د بلوګوردو والي ویاچسلاف ګلادکوف په ټېلګرام کې لیکلي، چې اوکراین په توغندیزو بریدونو کې د دوشنبې په سهار وختې د یاد ولایت د انرژۍ سیستم په نښه کړ، چې له امله یې د یاد ولایت د برېښنا، تودوخې او اوبو سیستم زیانمن شوی دی.

نوموړي زیاته کړې: «دا برید خورا پراخ و، د بلګورود ښار چې د اوکراین له پولې ۴۰ کیلومتره لرې دی په نښه شوی او شاوخوا سیمې هم په نښه شوې دي».

نوموړي د اوکراین په توغندیزو بریدونو کې د زیانونو کره کچه نه ده په ډاګه کړې.

د مکسیکو دفاع وزارت ويلي، د مکسیکو په لوېدیځ ایالت جالیسکو کې د یکشنبې په ورځ (د کب ۳مه) د نشه‌يي توکو یاد کاروباري لومړی په یوې نښته کې ټپي او وروسته مکسیکو ښار ته د هوايي انتقال پر مهال ومړ.

دغه وزارت ویلي، د یاد کس د نیولو لپاره امریکا ورسره معلومات شریک کړي وو. له دغو عملیاتو وروسته تاوتریخوالی راوپارېده او په څو ایالتونو کې لویې لارې وتړل شوې او یو شمېر موټر هم وسوځول شول.

د امریکا د بهرنیو چارو وزارت مرستیال کریسټوفر لېنډاو د اوسېګیرا وژل کېدل د امریکا او مکسیکو لپاره لوی پرمختګ بللی دی.

د نشه‌يي توکو دغه لوی کاروباري «نیمیسیو اوسېګیرا» چې په «ال‌منچو» مشهور وو، پخوا د پولیسو افسر وو.

ټاکل شوې، چې امریکا او ایران به د پنجشنبې په ورځ په جنیوا کې درېیم پړاو اټومي مذاکرات پیل کړي او داسې ښکاري، چې دا به پر ایران د پوځي اقدام د مخنیوي لپاره د مذاکراتو وروستی پړاو وي.

خو نیویارک ټایمز په خپل راپور کې ویلي، چې ټرمپ د مذاکراتو د ناکامۍ په صورت کې د ایران پروړاندې د اقداماتو پر انتخابونو غور کوي.

د ټرمپ سلاکارانو ویلي، چې نوموړي په راتلونکو ورځو کې پر ایران د یوه لومړني برید ترسره کولو ته لېوالتیا ښودلې، ترڅو د ایران مشران پوه کړي چې د اټومي وسلو له جوړولو لاس پر سر شي، خو په دې اړه لا هم وروستۍ پرېکړه نه ده شوې.

د راپورونو له مخې، په پام کې نیول شویو هدفونو کې د سپاه پاسداران له مرکزي دفتره نیولې د ایران تر اټومي مرکزونو او د بالسټیک توغندیو تر پروګرام پورې ټول شامل دي.

د نیویارک ټایمز په راپور کې راغلي، چې ډونالډ ټرمپ خپلو سلاکارانو ته ویلي چې که په یادو ګامونو هم تهران د هغه غوښتې ونه‌مني، نو په روان کال کې به د علي خامنه‌يي د راپرځولو لپاره د پوځي برید امکان هم په پام کې ونیسي.