د بلوچستان په پنجګور کې د وسله والو په برید کې ۶ تنه وژل شوي او دوه موټر سوځول شوي
ځايي سرچینې وايي، چې د بلوچستان ایالت د پنجګور ولسوالۍ په دستک سیمه کې نامعلومو وسله والو شپږ کسان وژلي او دوه موټر یې سوځولي دي. ځايي رسنیو د پولیسو له قوله راپور ورکړی، چې د پيښې نور جزئیات لا روښانه نه دي، خو سیمې ته پولیس رسېدلي دی.
پولیسو ویلی، چې له پيښې وروسته وسله وال له سیمې تښتېدلي دي.
له وژل شوو کسانو څخه دوه تنهد داود او فیض محمد په نومونو پېژندل شوي دي او د پاتې څلورو کسانو هویت نه دی روښانه شوی او نه هم د پيښې انګېزه تر دې دمه معلومه ده.
د پاکستان امنیتي ادارو په رسمي ډول څه نه دي ویلي او نه هم کومې وسله والې ډلې د پېښې مسوولیت منلی دی.
