د امریکا ولسمشر ډونالډ ټرمپ د ایران پر ضد د پوځي اقدام په اړه د متحده ایالاتو د پوځ د لوی درستیز جنرال ډنیل کین د مخالفت راپورونه «سل په سلو کې ناسم» وبلل او ټینګار یې وکړ، چې له تهران سره د جګړې یا هوکړې په اړه پرېکړه د ده په واک کې ده.
ټرمپ د دوشنبې په مازدیګر (د کب ۴مه) زیاته کړه، جنرال کین چې د ایران د اټومي پروګرام پر ضد د برید قومانده پر غاړه لرله، په دې باور دی چې د پوځي اقدام په صورت کې به دغه جګړه «په اسانۍ د ګټلو وړ» وي.
د امریکا ولسمشر هغه رسنۍ چې دا معلومات یې خپاره کړي «جعلي خبري رسنۍ» وبللې او زیاته یې کړه: «جنرال کین هېڅکله د ایران پر وړاندې د اقدام نه کولو په اړه خبرې نه دي کړې او ان د هغو ساختګي محدودو بریدونو په اړه یې هم څه نه دي ویلي چې زه یې په اړه لولم. هغه یوازې یو شی پېژني او هغه دا چې څنګه بریا خپله کړي او که امر ورته وشي، هغه به تر ټولو وړاندې وي او مشري به یې هم خپله وکړي».
د امریکا ولسمشر یو ځل بیا ټینګار وکړ، چې غوره ګڼي له ایران سره یوې هوکړې ته ورسېږي، خو په ورته وخت کې یې خبرداری ورکړ چې که هوکړه ونهشي، «هغه ورځ به د دغه هېواد او په ډېرې خواشینۍ سره د هغوی د خلکو لپاره یوه خورا بده ورځ وي».
دا په داسې حال کې ده، چې تر دې وړاندې اکسیوس په خپل یوه راپور کې وویل چې د امريکا د پوځ د ګډو ځواکونو لوی درستيز د دغه هېواد ولسمشر او لوړپوړو چارواکو ته خبرداری ورکړی، چې پر ايران پوځي بريد کولای شي جدي او درانه ګواښونه ولري. د راپور لهمخې، هغه ويلي دي چې دا ډول ګام به امريکا په يوه اوږده جګړه کې ښکېله کړي.
