سهیل اپریدي په تیرا کې د ملکي وګړو وژنه د پاکستان امنیتي ځواکونو «بېکفایتي» بللې
د خیبرپښتونخوا سر وزیر سهیل اپریدي په تیرا دره کې د څلورو ملکي وګړو وژل او د پنځو نورو د ټپې کېدو پېښه غندلې او په خېبر ولسوالۍ کې یې د پاکستان امنیتي ځواکونو لهخوا ملکي تلفات «د بېکفایتۍ او ناتوانۍ» پایله یاده کړې.
هغه د یادې پېښې په اړه پر اېکس پاڼه لیکلي: «یو ځل بیا په تیرا کې بېګناه خلک د امنیتي ځواکونو لهخوا په نښه شول. زه دا غندم، څلور بېګناه ملکي وګړي ووژل شول او پنځه نور ټپیان شول. دغه ملکي تلفات هلته د ګومارل شوو امنیتي سرتېرو د بېکفایتۍ له امله رامنځته شوي دي».
نوموړي زیاته کړې، چې صوبايي حکومت د قربانیانو د کورنیو ملاتړ کوي او په غم کې یې شریک دی. ورته مهال د پاکستان تحریک انصاف ګوند هم په تیرا کې د ملګي وګړو وژنه خواشینوونکې یاده کړې او د پلټنو غوښتنه یې کړې ده.
تر دې وړاندې سرچینو افغانستان انټرنشنل ـ پښتو ته ویلي و، چې د شنبې په ورځ ناوخته د خېبرپښتونخوا په تیرا کې د ملکي وګړو پر کورونو د هاوان مرمیو د لګېدو په پېښه کې پنځه کسان وژل شوي او اووه نور ټپیان دي.
د دغې پېښې په غبرګون کې د سیمې اوسېدونکو پراخ لاریون پیل کړ او د هاوان مرمۍ د لګېدو له امله د یوه وژل شوي کس مړی یې د اعتراض په توګه په باړه بازار کې پر سړک اېښی و.
