امریکا د سوریې له «قصرک» پوځي اډې نه د خپلو ځواکونو اېستل پیل کړل
د سوریې دریو پوځي او امنیتي سرچینو ویلي چې امریکايي ځواکونو د دوشنبې په ورځ د سوریې په حسکه ولایت کې له خپلې سترې اډې قصرک څخه د وتلو بهیر پیل کړی دی. د عیني شاهدانو په وینا، لسګونه لارۍ چې ځینو یې زغرهوال ګاډي لېږدول، سهار له قصرک اډې څخه ووتلې.
دا ګام داسې مهال اخېستل کیږي، چې په دمشق کې د امریکا متحد حکومت هڅه کوي په سیمه کې خپل کنټرول ټینګ کړي.
که له قصرک اډې وتل بشپړ شي، بیا هم د امریکا په مشرۍ ایتلاف به د عراق پولې ته نږدې په رمیلان کې خپله اډه وساتي.
قصرک د اسلامي دولت ډلې پر ضد د امریکا په مشرۍ د نړیوال ایتلاف د عملیاتو مهم مرکز و.
امریکايي ځواکونه له څه باندې یوې لسیزې راهیسې په سوریه کې مېشت وو او د کُردانو په مشرۍ د سوریې له دموکراتیکو ځواکونو سره یې د داعش ډلې پر ضد همکاري کوله.
د سوریې د دفاع وزارت او د سوریې دموکراتیکو ځواکونو تر اوسه په دې اړه تبصره نه ده کړې.
