د مسکو هوايي ډګرونه چې د اوکراین د ډرون بریدونو له وېرې تړل شوي وو بېرته فعال شول
رویټرز خبري اژانس وايي، د یکشنبې په ماسپښین د مسکو پر لور د اوکرایني بېپيلوټه الوتکو د روانېدو له وېرې د مسکو ټول هوايي ډګرونه وتړل شول، خو د ډرون بریدونو له دفع کېدو وروسته د یکشنبې په ماښام ټول هوايي ډګرونه بېرته خپل عادي حالت ته وګرځېدل.
د رویټرز د راپور لهمخې، د یکشنبې په ماسپښین ۳ بجې له اوکراین څخه ۲۴ بېپیلوټه الوتکې د مسکو پر لور روانې شوې وې؛ خو د بریدونو له شنډېدو شاوخوا ۵ ساعته وروسته د مسکو ټولو هوايي ډګرونو بېرته خپل فعالیتونه پیل کړل.
د روسیې د دفاع وزارت بیا ویلي، په همدې موده کې یې د مسکو شاوخوا سیمو او همداراز د روسیې د مرکزي سیمو پر لور روانې ۱۳۰ بېپيلوته الوتکې رانسکورې کړې دي.
