د مسکو هوايي ډګرونه چې د اوکراین د ډرون بریدونو له وېرې تړل شوي وو بېرته فعال شول

د روسیې د بلوګوردو والي ویاچسلاف ګلادکوف په ټېلګرام کې لیکلي، چې اوکراین په توغندیزو بریدونو کې د دوشنبې په سهار وختې د یاد ولایت د انرژۍ سیستم په نښه کړ، چې له امله یې د یاد ولایت د برېښنا، تودوخې او اوبو سیستم زیانمن شوی دی.

نوموړي زیاته کړې: «دا برید خورا پراخ و، د بلګورود ښار چې د اوکراین له پولې ۴۰ کیلومتره لرې دی په نښه شوی او شاوخوا سیمې هم په نښه شوې دي».

نوموړي د اوکراین په توغندیزو بریدونو کې د زیانونو کره کچه نه ده په ډاګه کړې.

د مکسیکو دفاع وزارت ويلي، د مکسیکو په لوېدیځ ایالت جالیسکو کې د یکشنبې په ورځ (د کب ۳مه) د نشه‌يي توکو یاد کاروباري لومړی په یوې نښته کې ټپي او وروسته مکسیکو ښار ته د هوايي انتقال پر مهال ومړ.

دغه وزارت ویلي، د یاد کس د نیولو لپاره امریکا ورسره معلومات شریک کړي وو. له دغو عملیاتو وروسته تاوتریخوالی راوپارېده او په څو ایالتونو کې لویې لارې وتړل شوې او یو شمېر موټر هم وسوځول شول.

د امریکا د بهرنیو چارو وزارت مرستیال کریسټوفر لېنډاو د اوسېګیرا وژل کېدل د امریکا او مکسیکو لپاره لوی پرمختګ بللی دی.

د نشه‌يي توکو دغه لوی کاروباري «نیمیسیو اوسېګیرا» چې په «ال‌منچو» مشهور وو، پخوا د پولیسو افسر وو.

ټاکل شوې، چې امریکا او ایران به د پنجشنبې په ورځ په جنیوا کې درېیم پړاو اټومي مذاکرات پیل کړي او داسې ښکاري، چې دا به پر ایران د پوځي اقدام د مخنیوي لپاره د مذاکراتو وروستی پړاو وي.

خو نیویارک ټایمز په خپل راپور کې ویلي، چې ټرمپ د مذاکراتو د ناکامۍ په صورت کې د ایران پروړاندې د اقداماتو پر انتخابونو غور کوي.

د ټرمپ سلاکارانو ویلي، چې نوموړي په راتلونکو ورځو کې پر ایران د یوه لومړني برید ترسره کولو ته لېوالتیا ښودلې، ترڅو د ایران مشران پوه کړي چې د اټومي وسلو له جوړولو لاس پر سر شي، خو په دې اړه لا هم وروستۍ پرېکړه نه ده شوې.

د راپورونو له مخې، په پام کې نیول شویو هدفونو کې د سپاه پاسداران له مرکزي دفتره نیولې د ایران تر اټومي مرکزونو او د بالسټیک توغندیو تر پروګرام پورې ټول شامل دي.

د نیویارک ټایمز په راپور کې راغلي، چې ډونالډ ټرمپ خپلو سلاکارانو ته ویلي چې که په یادو ګامونو هم تهران د هغه غوښتې ونه‌مني، نو په روان کال کې به د علي خامنه‌يي د راپرځولو لپاره د پوځي برید امکان هم په پام کې ونیسي.

تر هغه وروسته چې د عمان د بهرنیو چارو وزیر په جنیوا کې د ایران او امریکا ترمنځ د درېیم پړاو اټومي مذاکراتو د پیلېدو خبر ورکړ، رویټرز اژانس ویلي چې ایران له امریکا سره هوکړې ته د رسېدو لپاره په خپل اټومي پروګرام کې د نویو امتیاززونو ورکړې ته چمتو دی؛ خو په دې شرط چې پر ایران اقتصادي بندیزونه لغوه شي او د سوله‌ییز اټومي غني کولو په برخه کې د تهران حق په رسمیت وپېژندل شي.

د امریکا او ایران ترمنځ د اټومي مذاکراتو د درېیم پړاو له تایید وروسته، د ایران ولسمشر مسعود پزشکیان پر خپلې اېکس‌پاڼې لیکلي، چې هېواد یې په سیمه کې سولې او ثبات ته ژمن دی او له امریکا سره وروستۍ خبرې اترې له «هڅوونکو نښو» سره مل وې.

د امریکا او ایران ترمنځ د اټومي مذاکراتو دویم پړاو تېره اوونۍ په جنیوا کې ترسره شو، خو لا هم دواړه لوري کومې مطلوبې هوکړې ته نه دي رسېدلي.

یونېسف پر اوکراین د روسیې د برید د څلورو کلونو د پوره کېدو په درشل کې د یوې اعلامیې په خپرولو سره د جګړې له امله د بې‌ځایه شویو ماشومانو په اړه ژوره اندېښنه ښودلې ده.

د یاد سازمان په اعلامیه کې راغلي: «د اوکراین د جګړې له پیل څخه څلور کاله تېرېږي، خو لا هم له ۲،۵ میلیونو څخه ډېر ماشومان بې‌ځایه شوي دي چې ډېری یې څو ځلې تېښتې ته اړ شوي دي».

یونېسف ویلي، چې د جګړې له امله ځپل شوي ماشومان چې په اوکراین او ګاونډیو هېوادونو کې مېشت دي، روغتیايي، خوراکي او تعلیمي مرستې رسوي.

د ملګرو ملتونو یادې ادارې یوځل بیا غږ کړی، چې د جګړې اړخونه دې د ملکیانو او په ځانګړې توګه د ماشومانو ژوند ته‌ ډېره پاملرنه وکړي.