امریکايي رسنۍ: د پنجشنبې خبرې تر احتمالي برید مخکې د ایران لپاره وروستی فرصت بلل شوی
«اکسیوس» د امریکایي چارواکو په حواله راپور ورکړی، چې د روانو خبرو اترو هڅه د ایران لپاره وروستی فرصت دی؛ څو د ډونالډ ټرمپ له ادارې سره هوکړې ته ورسېږي، که نه امریکا به پراخ پوځي عملیات پیل کړي چې ښایي علي خامنهیي هم په نښه کړي.
ټاکل شوې، چې د خبرو نوی پړاو پنجشنبه (د کب په ۷مه) په جېنوا کې ترسره شي. د راپور له مخې؛ یوه لوړپوړي امریکايي چارواکي (د حوت په ۳مه) ویلي، که ایران په راتلونکو ۴۸ ساعتونو کې روښانه او مشخص وړاندیز وړاندې کړي؛ نو امریکايي مذاکره کوونکي چمتو دي چې د پنجشنبې په ورځ په جېنوا کې نوې خبرې پيل کړي.
نوموړي ټینګار کړی، چې د ټرمپ اداره د تهران د وړاندیز مسودې ته په تمه ده. راپور زیاتوي، سټیو وېټکاف او جرد کوشنر چې ډونالډ ټرمپ ته یې د پوځي برید له امر مخکې د ډیپلوماسۍ د فرصت ورکولو سپارښتنه کړې؛ په پام کې لري چې د ایران له لوري د وړاندیز د لېږلو په صورت کې (د حوت په ۷مه) جېنوا ته ولاړ شي.
دغه امریکايي چارواکي دا هم ویلي، چې دواړه لوري ښايي د هر اړخیز اټومي تړون تر لاسلیک مخکې د یوې لنډمهاله هوکړې پر سر خبرې وکړي.
