حافظ حمدالله: که بریدونه «هند او خوارج» کوي نو ولې یوازې پر افغانستان برید کیږي
د پاکستان جمعیت علمای اسلام ګوند لوړپوړي مشر او پخواني سناتور حافظ حمدالله ویلي، چې که پر پاکستان بریدونه د هند او خوارجو له لوري کېږي، نو پر افغانستان ولې بمبار کېږي او پر هند نه کیږي. هغه د پاکستان د حکومت رسمي دریځونه او عملي اقدام په ټکر کې بللي.
حافظ حمدالله، پر ایکس لیکلي، «کله چې په بلوچستان کې برید وشي، پاکستان وایي چې دا د «فتنه هند» کار دی، او کله چې په خیبر پښتونخوا کې برید وشي، نو ادعا کېږي چې دا د «فتنه الخوارج» له لوري شوی دی، خو په غبرګون کې بیا پر افغانستان د جیټ الوتکو له لارې بمبار کېږي.
حافظ حمدالله پوښتنه کړې، چې که بریدونه د هند له لوري وي، نو بیا پر هند ولې بمبار نه کېږي؟ هغه دا چلند «ښکاره تضاد» بللی او ویلي یې دي چې د واک او اختیار خاوندان باید ټول پاکستاني ملت ته د دې پوښتنې ځواب ورکړي.
نوموړي زیاته کړې چې ولس په دې اړه مغشوش دی او اړتیا ده چې د پاکستان حکومت روښانه وضاحت وړاندې کړي.
