افغانستان له سریلانکا سره د شل اوریزو او یو ورځنیو کرېکټ سیالیو کوربه توب کوي
د افغانستان کرېکټ بورډ اعلان کړې، چې افغانستان به د راتلونکې مارچ میاشتې له ۱۳مې نېتې څخه په متحده عربي اماراتو کې د سریلانکا کرېکټ لوبډلې سره د سپین توپ(شل اوریزو او یو ورځنیو) سیالیو کوربه وي.
کرېکت بورډ زیاتوي، چې دغه لړۍ به د مارچ په ۱۳مه په شارجه کې د دریو شل اوریزو نړیوالو لوبو په ترسره کېدو پیل شي. وروسته به درې یو ورځنۍ نړیوالې لوبې د مارچ له ۲۰مې نېټې څخه په دوبۍ کې وشي.
دواړو لوبډلو وروستی ځل د ۲۰۲۴کال په لومړیو کې مخامخ سیالۍ کړې وې، هغه مهال د افغانستان لوبډلې سریلانکا ته سفر کړی و، اوپه هغه لړۍ کې سریلانکا د یو ورځنیو لوبو لړۍ۳–۰ وکټله او د شل اوریزو لړۍ یې ۲–۱ په خپل نوم کړه.
د افغانستان کرېکت بورډ اجرایوي مشر نصیب خان ویلي چې دا به په تاریخ کې لومړی ځل وي چې افغانستان په دوه اړخیزه لوبلړۍ کې د سریلانکا کوربهتوب کوي.
بل خوا د سریلانکا کرېکټ اجرایوي مشر اشلي ډی سلوا هم دا سفر تاریخي بللی او ویلي یې دي چې دا به لومړی ځل وي چې سریلانکا د افغانستان په کوربهتوب ترتیب شوې دوه اړخیزه لوبلړۍ کې برخه اخلي.
