ذبیح الله مجاهد: د پاکستان «واقعي علماء» پر افغانستان د پاکستاني پوځ د بریدونو مخالف دي
د طالبان ویاند ذبیح الله مجاهد وایي چې د پاکستان واقعي دیني عالمان پر افغانستان د دغه هېواد د «نظامي کړیو» د تېرې شپې د بریدونو مخالف دي. هغه زیاته کړې چې « د پاکستان یو شمېر درباري علما شته چې د پوځ داسې کړنو ته جواز ورکوي».
مجاهد د پاکستان د علماوو شورا مشر طاهر اشرفي څرګندونو ته په غیر مستقیمه اشاره وویل چې دا د دغه هېواد د پوځ د درباري ملایانو څرګندونې دي.
مولانا طاهر اشرفي د افغانستان په خاوره د پاکستاني الوتکو له بریدونو وروسته په یوه ویډیویي پیغام کې د پاکستاني پوځ د هوایي بریدونو ننګه کړې وه او ویلي یې و، چې که په دغو بریدونو کې جومات هم په نښه شوی وي، نو پیغمبر خپله د ضرار په نامه د یوه جومات د سوځولو امر ورکړی و.
مجاهد د طالبانو په ولکه کې د افغانستان ملي ټلویزون سره په مرکه کې ویلي، « هغو قدرتونو چې په افغانستان کې ماته خوړلې پر پاکستان له خاصې او حاکمې حلقې نه ګټه پورته کوي او د خپلو موخو لپاره یې لوبوي».
طالب ویاند په خپلو خبرو کې ویلي، چې پاکستاني پوځ له بهرنیو لوریو د سیمې د ناامنۍ لپاره پروژې اخیستې او په سیمه کې د ناامنۍ لپاره پلمې لټوي.
هغه ادعا وکړه چې د روان کال د مني په بریدونو کې هم طالبانو پاکستان ته ځواب ورکړی و او «یوازې په یوه ورځ یې شل نظامي پوستې له منځه وړې او ۵۸پاکستاني سرتېري یې وژلي» و و.
د نوموړي په وینا، طالبانو درې پاکستاني سرتېري هم ژوندي نیولي وو، چې تېره اونۍ یې د سعودي عربستان په منځګړتوب بېرته خوشې کړل.
مجاهد زیاته کړې چې پاکستان لا هم له افغانانو سره له مخامخ کېدو عبرت نه دی اخیستی او «یو ځل بیا به وویني چې افغانان څه کوي».
طالبانو تر اوسه د پاکستان د پوځ بریدونو ته، چې دوی یې د « خاصې حلقې» کار بولي، ځواب نه دی ورکړی.
