د اوکراين ولسمشر ولاديمير زېلېنسکي اعلان وکړ، چې د روسيې ولسمشر ولاديمير پوتين درېيمه نړۍواله جګړه پيل کړې ده. زېلېنسکي د برېتانيا له بيبيسي سره په مرکه کې وويل، د پوتين کړنو په رښتيا سره نړۍ يوې پراخې جګړې ته ننويستې ده.
هغه ټينګار وکړ، چې د روسيې د ولسمشر د درولو يوازينۍ لار پر مسکو سخت پوځي او اقتصادي فشار راوستل دي.
د اوکراين ولسمشر خبرداری ورکړ، چې پوتين به يوازې پر اوکراين بسنه ونهکړي او که يې مخه و نه نيول شي، د هغه د کړنو لمن به د دې هېواد له پولو واوړي او نورو سيمو ته به وغځېږي. هغه زياته کړه، که روسيه د اوکراين په نيولو او اشغال کې پاتې راشي، دا به د نړۍوالې ټولنې لپاره لويه بريا وي.
په همدې مهال اوکرايني چارواکو وويل، چې د روسيې د بېپيلوټه الوتکې د بريد له امله د اوديسا په بندري ښار کې دوه تنه وژل شوي او درې نور ټپيان دي. د چارواکو په وينا، د ژغورنې او مرستې چارې لا هم د پېښې په ځای کې روانې دي.
