د ملګرو ملتونو د عمومي اسمبلۍ مشره: نړۍواله ټولنه باید په اوکراین کې اوربند رامنځته کړي
پر اوکراین د روسیې د پراخ یرغل له څلورمې کالیزې سره هممهاله، د ملګرو ملتونو د عمومي اسمبلۍ مشرې له نړۍوالې ټولنې وغوښتل، چې د دې جګړې د پای ته رسولو لپاره پرېکنده او روښانه ګامونه پورته کړي.
انالنا بربوک د سېشنبې په ورځ (د کب ۶مه) په خپل اېکس کې د یوه پيغام په خپرولو سره زیاته کړه، چې دغه جګړه لا هم د اوکراينیانو لپاره درانه کړاوونه لري او ستر زيانونه یې ورته اړولي دي چې اړينه ده د دې جګړې د سملاسي درولو لپاره نړۍوالې هلې ځلې لا زياتې شي.
هغې چې د بېړنۍ ځانګړې يوولسمې غونډې پر مهال خبرې کولې څرګنده کړه، چې نړۍواله ټولنه بايد د سملاسي، بشپړ او بېقيده اوربند پر ټينګښت ټينګار وکړي، څو د نښتو او جګړو د پای ته رسېدو لپاره لار هواره شي.
د ملګرو ملتونو د عمومي اسمبلۍ مشرې همداراز وويل، د سولې هر ډول هوکړه بايد د ملګرو ملتونو د منشور، د نړۍوال قانون د بنسټيزو اصولو او د عمومي اسمبلۍ د تصويب شويو پرېکړهليکونو پر بنسټ جوړه شي. د هغې په وينا، يوازې له همدې لارې کېدای شي يو هر اړخيز، عادلانه او تلپاتې سوله رامنځته شي.
