سيبياېس: ټرمپ د تهران پرضد د پوځي اقدام د محدوديتونو له امله ناراضه دی
سيبياېس نيوز د څو باخبره سرچينو په حواله راپور ورکړی، د امريکا ولسمشر ډونالډ ټرمپ په زياتېدونکې توګه له هغو محدوديتونو ناخوښي څرګندوي چې د تهران پر ضد د پوځي ځواک د کارولو لپاره وضع شوي دي.
د راپور له مخې؛ د امريکا پوځي پلان جوړوونکو خبرداری ورکړی، چې د تهران پر پوځي او ستراتيژيکو شتمنيو هر ډول بريد ښايي پرېکنده او يوځلنی ګوزار ونه اوسي؛ بلکې ښایي شخړه لاپسې پراخه او په منځني ختيځ کې اوږدمهاله منازعې ته لاره هواره کړي.
سرچينو ويلي، د امريکايي چارواکو وروستي بحثونه تر ډېره د احتمالي غچ اخيستونکو اقداماتو پر ګواښونو او دغه احتمال متمرکز وو چې محدوده بريدونه به ونه شي کولای د ايران د حکومت پوځي وړتياوې کمزورې کړي.
د راپور په ټکو، دغه وضعيت ښايي امريکا په سیمه کې له یوې پراخې شخړې سره مخ کړي.
