د ملګرو ملتونو د بشري مرستو د همغږۍ دفتر (اوچا) وایي، یوازې په ۲۰۲۵ کال کې شاوخوا ۲.۷۸ میلیونه افغان کډوال هېواد ته ستانه شوي دي. د اوچا د شمېرو لهمخې، نږدې یو میلیون او ۸۸ زره کسان له ایران او شاوخوا ۸۹۹ زره نور له پاکستان څخه افغانستان ته داخل شوي دي.
ملګري ملتونه وایي، چې دغه بهیر د ګاونډیو هېوادونو له لوري د جبري اېستلو او د کډوالۍ د محدودیتونو د سختېدو له امله رامنځته شوی دی. د دغو کډوالو په منځ کې، دوه میلیونه او ۳۰۰ زره کسان قانوني اسناد نه لري او شاوخوا ۴۸۴ زره نور یې بیا معتبر اسناد لري.د کډوالو د اېستلو د بهیر په اوج کې د جون او جولای میاشتو په لړ کې له ایران څخه د ورځنیو راستنېدونکو شمېر له ۳۰ څخه تر ۴۰ زرو کسانو پورې رسېدلی دی. ملګري ملتونه وایي، چې دې بېساري راستنېدنې په سرحدي مرکزونو کې د منلو وړتیا په سختۍ سره تر فشار لاندې راوستې او د ثبت، لېږدونې او د لومړنیو خدمتونو د وړاندې کولو بهیر یې له جدي ننګونو سره مخ کړی دی.اوچا وایي، چې له بشري بنسټونو سره په همغږۍ یې د بېړنیو مرستو د وړاندې کولو لپاره خپلې هڅې زیاتې کړې دي، خو د بودیجې سخت کمښت د دې لامل شوی چې مرستې د ټولو اړمنو کسانو بسنه ونهکړي.د ملګرو ملتونو د بشري مرستو د همغږۍ دفتر وایي، چې د سرپناه برابرول، د خوراکي خوندیتوب پیاوړتیا، د معیشت ملاتړ او په ټولنه کې د بېرته مدغم کېدو د دوامداره پروګرامونو پلي کول د زیانمنو کډوالو ستونزو ته د رسېدو لپاره له بېړنیو لومړیتوبونو څخه دي.دغه سازمان خبرداری ورکړی، چې د اوږدمهاله ملاتړ نشتوالی د زیانمننې او ټولنیزې بېثباتۍ ګواښ لا پسې زیاتوي. اوچا وایي، چې د راستنېدونکو په منځ کې ښځې، نجونې او ماشومان تر ټولو زیانمنونکې ډلې ګڼل کېږي. د دې سازمان د څېړنو لهمخې، نږدې درېیمه برخه راستنېدونکي ښځې او نجونې دي.همدارنګه تر ۱۷ کلونو کم عمره ماشومان په ځانګړې توګه بېسرپرسته یا له کورنیو جلا شوي ماشومان د بېړنۍ ساتنې ملاتړ، د کورنیو د لټون خدمتونو او اروايي-ټولنیزو مرستو ته اړمن بلل شوي دي. ملګري ملتونه وایي، چې بېاسناده راستنېدونکي هم بنسټیزو خدمتونو او د معیشت فرصتونو ته په لاسرسي کې له جدي خنډونو سره مخ دي.
