روسي چارواکو ویلي چې یوه ځانمرګي بریدګر د سې شنبې په سهار د مسکو په مرکزي برخه کې د سیالوفسکي اورګاډي سټیشن ته نږدې ځان الوځولی دی. ځانمرګې چاودنې یو ترافیک پولیس افسر وواژه او دوه نور یې ټپیان کړل. پوتین وویل چې ځانمرګی بریدګر انلاین استخدام شوی و.
د روسیې د کورنیو چارو وزارت وویل، چې پولیس افسرانو د سیایلوفسکي حوزې شاوخوا سیمه کې ګزمې کولې، چې په نښه شول.
د سپینې ماڼې ویاندې ویلي، چې د ټرمپ لومړنی انتخاب له تهران سره د تعامل لپاره تل ډیپلوماسي ده، خو که اړتیا وي، د مرګوني ځواک کارولو ته هم چمتو دی.
کارولین لیویت د سې شنبې په ورځ له رسنیو سره په خبرو کې وویل: «د ولسمشر ټرمپ لومړنی انتخاب تل ډیپلوماسي ده. خو لکه څنګه چې هغه ښودلي، که اړتیا وي د متحده ایالاتو پوځي ځواک د وژونکي ځواک کارولو ته چمتو دی».
رویټرز د یوې سرچینې له قوله لیکلي چې ټاکل شوې د امریکا د بهرنیو چارو وزیر مارکو روبیو به د سې شنبې په ورځ ناوخته کانګرس ته د ایران په اړه معلومات ورکړي.
متحده ایالاتو د احتمالي بریدونو دمخه د ایران په ساحلي سیمو کې پراخ سمندري ځواک ځای پر ځای کړی دی. ټرمپ د فېبرورۍ په ۱۹مه وویل چې هغه تهران ته شاوخوا ۱۰ تر ۱۵ ورځې وخت ورکوي چې یوې معاملې ته سره ورسیږي.
ټرمپ ممکن د سې شنبې په شپه د خپل دولت د اتحاد په وینا کې د ایران د اتومي پروګرام په اړه هم خبرې وکړي.
په تهران کې یوې انقلابي محکمې د محمد عباسي په نوم یو کس ته «له خدای سره د دښمنۍ» په تور د اعدام حکم صادر کړی دی. که دا حکم د ایران د سترې محکمې له خوا تایید شي، نو دا به د جنورۍ د ډلهییزو اعتراضونو سره تړلی لومړنی اعدام وي.
سرچینې وايي چې عباسي د یوه امنیتي افسر د وژلو په تور محکوم شوی، خو د هغه کورنۍ دا تور ردوي. د عباسي لور، فاطمه عباسي، ته هم دغو اعتراضونو کې د ګډون له امله د۲۵ کاله بند سزا ورکړل شوې ده.
د دغو ګډوډیو پر مهال د امریکا ولسمشر ډونالډ ټرمپ تهران ته خبرداری ورکړی و چې که اعدامونه ترسره کړي، نو کېدای شي د پوځي اقدام امر وکړي.
د بشري حقونو ډلې وایي چې د دغو اعتراضونو د ځپلو په لړ کې لسګونه زره کسان وژل شوي دي.
دا د ۱۹۷۹م کال اسلامي انقلاب راهیسې په ایران کې تر ټولو ستره کورنۍ ناکراري بلل کېږي.
سرچینې زیاتوي چې تورن کسان خپل شخصي وکیل ته لاسرسی نه لري او ورته یو دولتي مدافع وکیل ټاکل شوی دی.
سرچینې د سېشنبې په ورځ رویټرز ته وویل چې د ایران قضایي قوې لا تر اوسه د محمد عباسي پر وړاندې دا حکم په رسمي ډول نه دی اعلان کړی او د ایران سترې محکمې هم لا دا حکم نه دی تایید کړی.
د ایران د پوځ یوه چورلکه د سې شنبې په ورځ د اصفهان ولایت په مرکزي سیمه کې د مېوو په بازار کې ولوېده، چې له امله یې پيلوټ، مرستيال پيلوټ او دوه هټیوال مړه شوي دي. رپوټونه زیاتوي چې چورلکه په دورچې ښار کې راولوېده او اور ولګېد، خو د اوروژنې ډلې اور وواژه.
کارپوهان وايي چې ایران د هوايي خوندیتوب کمزوری ریکارډ لري او څو ځله د الوتکو د لوېدو پېښې پکې شوې دي.
ډېری دغه الوتکې د۱۹۷۹ کال تر انقلاب مخکې پېرودل شوې او د اصلي پرزو د نشتوالي له امله خوندي نه دي.
تېره اونۍ هم د ایران د هوايي ځواک یوه جنګي الوتکه «اېف–۴» د همدان ولایت په لوېدیزه سیمه کې د روزنیزې الوتنې پر مهال ولوېده، چې یو پيلوټ پکې ووژل شو.
د امریکا ولسمشر ډونالډ ټرمپ هغه راپورونه چې وايي، د امریکا د ګډو ځواکونو لوی درستیز جنرال ډینیل کېن د ایران پر وړاندې د پوځي اقدام مخالف دی «سل په سلو کې ناسم» وبلل او ټینګار یې کړی چې د تهران سره د جګړې یا هوکړې وروستۍ پرېکړه به د هغه وي.
ټرمپ د دوشنبې په ماښام پر ټروټ خواله رسنۍ لیکلي، جنرال کېن چې د ایران د اټومي پروګرام پر وړاندې یې د برید مشري کړې وه باور لري که پوځي اقدام وشي؛ نو دغه جګړه «په اسانۍ ګټلی شي».
نوموړي هغه رسنۍ چې دغه راپورونه یې خپاره کړي «د جعلي خبرونو رسنۍ» وبللې او ویې لیکل، چې جنرال کېن هېڅکله د ایران پر وړاندې د اقدام نهکولو خبره نهده کړې. د ټرمپ په وینا؛ جنرال کېن یوازې د بریا په څرنګوالي پوهېږي او که امر ورکړل شي د عملیاتو مشري به وکړي.
د امریکا ولسمشر یو ځل بیا ټینګار وکړ، چې غوره ګڼي له ایران سره هوکړې ته ورسېږي؛ خو خبرداری یې ورکړ که هوکړه ونه شي، «هغه ورځ به له بده مرغه د هغه هېواد او خلکو لپاره یې ډېره بده ورځ وي».
نیویارک ټایمز ورځپاڼه له هغو رسنیو څخه ده، چې د سپینې ماڼۍ د یوې ځانګړې غونډې په اړه یې راپور ورکړی دی. دغه غونډه (د سلواغې په ۲۹مه) د ټرمپ، د هغه د مرستیال، د بهرنیو چارو او دفاع وزیرانو، د سيایاې رییس او د پوځ د ګډو ځواکونو د لوی درستیز په ګډون ترسره شوې وه.
د فلسطین روغتیا وزارت خبر ورکړی، چې د اکټوبر له لسمې نېټې د اوربند له پیل راهیسې تر اوسه پر غزې د اسراییل په بریدونو کې لږترلږه ۶۱۵ فلسطینیان وژل شوي او ۱۶۵۱ نور بیا ټپیان شوي دي. د راپور له مخې؛ یوازې د اکټوبر په ۱۹مې او ۲۹مې نېټې بریدونو کې ټولټال ۱۵۴ کسان وژل شوي دي.
د اسراییل او حماس ترمنځ د اوربند تړون د امریکا د ولسمشر ډونالډ ټرمپ د وړاندیز شوې طرحې پر بنسټ ټینګ شو. د یادې طرحې په لومړي پړاو کې یوشمېر اسراییلي او فلسطیني بندیان هم خوشې شوي وو.
الجزیرې ټلوېزیوني شبکې راپور ورکړی، چې د جګړې له پیل راهیسې تراوسه پورې پر غزې د اسراییل په بریدونو کې ۷۲زره او ۷۳ فلسطینیان وژل شوي دي. په راپور کې راغلي، چې د اسراییل په هوایي او ځمکنیو بریدونو کې بیا د فلسطین ۱۷۱زره او ۷۴۹ وګړي ټپیان شوي هم دي.
په دې مرګ ژوبله کې ډېری یې ښځې او ماشومان دي.