د روسیې د پلازمېنې مسکو ښار د رېلګاډي په یوه تمځای کې د یوې چادونې له امله د پولیسو یو افسر او یو شکمن کس وژل شوي او دوه نور پولیس ټپيان دي. دغه پېښه نن سهار وختي (سېشنبه د کب ۵مه) رامنځته شوې ده.
د روسیې خبري اژانسونو د پولیسو له قوله راپور ورکړی، چې د سېشنبې په سهار وختي د مسکو د ساویولوفسکي د اورګاډي په تمځای کې چاودنه شوې، چې له امله یې دوه کسان وژل شوي دي. په وژل شویو کې یو پولیس افسر او یو شکمن کس چې ګومان کېږي همدا چاودېدونکي توکي یې ځای پر ځای کړي و، شامل دي.
د پولیسو په وینا، په دې چادونه کې دوه نور پولیس افسران ټپيان شوي او پولیسو لا تر اوسه د دغې پېښې د لامل په اړه نور جزییات نهدي ورکړي.
د ايران د خراسان رضوي د سرحدي پوليسو چارواکي وايي، د تايباد په سرحدي سيمه کې يې د وسلو او جنګي توکو يوه جوپه نيولې. پوليسو تر اوسه نه دي ويلي چې دا وسلې له کوم ځايه تايباد ته رسېدلي. تايباد د افغانستان له پولې سره نږدې پرته سيمه ده او له دوغارون څخه شاوخوا ۱۸ کيلومتره واټن لري.
د ایران د تسنیم خبري اژانس د راپور لهمخې، د سرحدي ځواکونو قومندان مجيد شجاع ويلي چې دا عمليات د يکشنبې ماښام د کب په درېيمه نېټه ترسره شوي دي. د هغه په وينا، دغه ګام ايران ته د وسلو د ننوتلو د مخنيوي د پروګرام په چوکاټ کې پورته شوی دی.
نوموړي زياته کړې، تر هغه وروسته چې د تايباد په پوله کې د وسلو د يوې جوپې د راوړلو او پټولو په اړه راپورونه تر لاسه شول، نو سملاسي استخباراتي څارنې او پلټنې پيل شوې.
د خراسان رضوي د سرحدي پوليسو د خبرپاڼې لهمخې، په دې جوپه کې اته ميله تومانچې، شپاړس دانې د مرمیو بکسونه، دولس پايه چاودېدونکي نلونه او يو څلوېښت ټوټې لاسي بم موندل شوي دي.
قومندان شجاع وويل، چې پلان دا و څو دا وسلې لومړی په سرحدي سيمه کې پټې کړل شي او وروسته د نورو کسانو لهخوا د دغه هېواد دننه ولېږدول شي. هغه همدارنګه زياته کړې، چې د دغو مهماتو د لېږد د عاملينو په اړه ځيني مالومات ترلاسه شوي او د هغوی د پېژندلو او نيولو هڅې روانې دي.
د دوشنبې په سهار یوه ۳۵ کلن افغان د جرمني د وورتسبورګ ښار د اورګاډي د مرکزي تمځای په تالار کې پر درېیو کسانو د چاقو برید کړی او هغوی یې برسېرن ټپیان کړي دي. دغه پېښه د همدې تمځای د ننوتلو دروازې ته نږدې د «یهوه شاهدانو» د مذهبي ډلې یوې غرفې ته څېرمه شوې ده.
د پولیسو په وینا، بریدګر هغه ۶۸ کلن سړي ته ورنږدې شوی و چې د یادې غرفې مسوولیت یې پر غاړه درلود او ناڅاپه یې څو ځله د چاقو ګوزارونه پرې وکړل. پولیسو زیاته کړې، چې یاد افغان په همدې لړ کې دوه نور کسان هم تر برید لاندې راوستي او د چړو ګوزارونه یې پرې کړي دي.
شاهدان یهوه یوه مسیحي مذهبي ډله ده، چې د نولسمې پېړۍ په وروستیو کې په متحدو ایالتونو کې رامنځته شوې ده.
د پولیسو د معلوماتو لهمخې، په دې پېښه کې یاد درې کسان برسېرن ټپیان شوي او داسې کوم څه نشته چې ثابته کړي د چاقو ګوزارونه دې ډېر ژور وي. یو شمېر لارویانو چې په هغوی کې یو پولیس هم ملکي جامې اغوستې وې، بریدګر مهار کړ او د مرستندویو ځواکونو تر رسېدو پورې یې تر کنټرول لاندې وساته.
یاد سړی دا مهال نیول شوی او په توقیف کې دی.
د جرمني رسنیو راپور ورکړی، چې د دې برید اصلي انګېزه تر اوسه په څرګنده نه ده معلومه شوې او پلټونکي دا قضیه د «د قتل هڅه» په توګه څېړي. لا هم روښانه نه ده، چې بریدګر په قصدي ډول د «شاهدان یهوه» پیروان په نښه کړي وو که بله کومه انګېزه یې لرله.
په فرانسه کې د امریکا سفیر چارلس کوشنر د دغه هېواد له حکومتي چارواکو سره له لیدنې منع شو. ډیپلوماټیکو سرچینو د دوشنبې په ورځ رویټرز خبري اژانس ته ویلي، دا پرېکړه وروسته له هغه وشوه چې نوموړی د فرانسې د بهرنیو چارو وزارت له لوري احضار کېدو ته حاضر نهشو.
د سرچینو په وینا، کوشنر وروسته له هغه د فرانسې د بهرنیو چارو وزارت ته احضار شو چې د امریکا سفارت د تېرې اوونۍ په ترڅ کې د یوه فرانسوي سختدریځه ښياړخي فعال د وژل کېدو په اړه څرګندونې خپرې کړې. سرچینې زیاته کړې: «د امریکا سفارت د هغې تراژیدۍ په اړه نظرونه څرګند کړي چې په فرانسه کې پېښه شوې ده او یوازې زموږ په کورنیو بحثونو پورې اړه لري؛ موږ اجازه نه ورکوو چې له دې موضوع ناوړه ګټه پورته شي. چارلس کوشنر نن وزارت ته احضار شو، خو حاضر نه شو».
د راپورونو لهمخې، د فرانسې سخت دریځه ښي اړخی فعال کوینټن درانک د یوې شخړې په ترڅ کې چې ویل کېږي د چپ اړخي سخت دریځو پورې تړلو کسانو سره و، وهل شوی او خپل ژوند یې له لاسه ورکړی. دغه پېښه د فرانسې ټولنه حیرانه کړې او «د فرانسې چارلي کرک شېبه» په نوم یاده شوې.
په همدې حال کې، په امریکا کې د فرانسې سفارت او د امریکا د بهرنیو چارو وزارت د ترهګرۍ ضد دفتر اعلان کړی چې دا قضیه تر څار لاندې ده. دغو ادارو په اېکس کې خبرداری ورکړی، چې «د چپ اړخي سخت دریځ تاوتریخوالی په زیاتېدو دی» او باید د عامه امنیت د ګواښ په توګه ورسره چلند وشي.
دا دویم ځل دی چې کوشنر د خپل احضار په غونډه کې ګډون نه کوي. د ۲۰۲۵ کال په اګسټ میاشت کې هم هغه وروسته له هغه چې په څرګنده توګه د فرانسې د یهود ضد کړنو د زیاتوالي په اړه اندېښنه څرګنده کړه او د فرانسوي چارواکو کړنې یې وغندلې، د یاد هېواد د بهرنیو چارو وزارت ته د سپیناوي لپاره غوښتل شوی و، خو په هغه غونډه کې هم حاضر نهشو.
د افغانستان د بشري حقونو کمېسیون پخوانی کمېشنر نادر نادري وايي، پاکستان پر افغانستان په بریدونو سره د «تیري جرم» کړی او د جرمونو نړۍواله محکمه یې باید وڅېړي. هغه ټينګار کړی، چې د طالبانو کړنې پاکستان ته د دې اجازه نهورکوي، چې پر بل هېواد تېری وکړي او ولسي وګړي ووژني.
نادر نادري چې د جمهوري نظام پر مهال حکومتي چارواکی هم پاتې شوی د دوشنبې په ورځ (د کب ۴مه) په خپله اېکسپاڼه ویلي: «د ملګرو ملتونو د منشور د ۵۱مې مادې لهمخې، له خپل ځانه د دفاع لپاره هېڅ معتبره منبع نشته او د ملګرو ملتونو د امنیت شورا له لوري هم هېڅ مجوز نهدی صادر شوی».
پاکستاني چارواکي بیا ادعا کوي، چې طالبانو د ټيټيپي او بلوڅ جنګیالیو ته پناه ورکړې، خو طالبان په وار وار دغه ادعاوې رد کړي او هغه یې د پاکستان کورنۍ مساله بللې ده.
د پاکستان ولسمشر اصف علي زرداري پر افغانستان د پاکستان د وروستیو بریدونو د توجیه لپاره ویلي، دغه هېواد د ترهګریزو بریدونو پر وړاندې له خپل ځانه د دفاع حق لري.
نادري په دې اړه څرګنده کړې: «د طالبانو ناسمې کړنې او له خلکو د ساتنې په برخه کې بېوسي یې د بېګناه ولسي وګړو د وژنې او یا د افغانستان د ځمکنۍ بشپړتیا نقض قانوني توجیه نهشي کېدلای». هغه زیاته کړې، ولسي وګړي د بشرپاله نړۍوالو قوانینو او د ملګرو ملتونو د منشور د اصولو له ملاتړه برخمن دي.
نادر نادري له نړۍوالو غوښتي چې پر افغانستان د پاکستان د بریدونو پر وړاندې بېتفاوته پاتې نشي.
د یادونې وړ ده، چې لا تراوسه له هند پرته هېڅ هېواد پر افغانستان د پاکستان بریدونه نهدي غندلي.
د برېتانیا پولیسو د دوشنبې په ورځ (د کب ۴مه) په امریکا کې د دغه هېواد پخوانی سفیر پېټر مندلسون د بد نامه امریکايي جېفري اپسټین په دوسیه کې د ښکېلتیا له امله د پولیسو له لوري ونیول شو. تر دې مخکې د برېتانیا یو شهزاده هم له اپسټين سره د اړیکو په تړاو نیول شوی وو.
د لندن پولیسو سره له دې چې د نیول شوي کس نوم نهدی یاد کړی ویلي: «یو ۷۲ کلن سړی د عامه دندې د ناسم چلند په شک په شمالي لندن کې نیول شوی دی». خو دغه مظنون په امریکا کې د برېتانیا پخوانی سفیر مندلسون یاد شوی.
د اسوشېتېد پرس د راپور لهمخې، پولیس له منډېلسون څخه په دې تړاو څېړنې کوي، چې شاوخوا ۱۵ کاله مخکې جېفري اپسټين ته حساس حکومتي معلومات ورکړي او همداراز تورن دی چې په جنسي پېښو کې هم ښکېل دی.
له دې پېښې ۴ ورځې مخکې شهزاده انډرو د ورته قضیې په تړاو د برېتانیا د پولیسو له لوري نیول شوی وو، خو هغه له ۱۱ ساعتونو توقیف وروسته ازاد شو.
پيټر مندلسون وروسته له هغې چې له اپسټين سره یې کړي اېمېلونه خپاره شول، د تېر کال په سپټمبر کې په امریکا کې له سفارت څخه ګوښه کړای شو.
د اپسټین اړوند خپرو شویو اسنادو کې راغلي، چې مندلسون په ۲۰۰۹ کال کې یو شمېر حساس حکومتي معلومات له اپسټين سره شریک کړي وو.
تر دې مخکې د همدې قضیې په تړاو د سلواغې په ۱۹مه د بریتانیا د لومړي وزیر د دفتر رييس مورګان مکسوییني په واشنګټن کې د بریتانیا د سفیر په توګه د پیټر مندلسون له انتصاب کېدو د ملاتړ په تړاو له خپلې دندې لاس په سر شوی وو.
د اپسټين جنجالي قضیه؛ د بریتانیا د لومړی وزیر د دفتر رييس استعفا وکړه | افغانستان انټرنشنل پښتو
د یادونې وړ ده، چې د بدنامه امریکايي جېفري اپسټین اړوند د شاوخوا ۳ میلیونه ډېر اسناد خپاره شوي او له هغه سره د اړیکو په تړاو ښکېل کسان په جنجال کې راګیر شوي دي.