د طالبانو د کورنیو چارو وزارت وایي، په نیمروز کې د یادې ډلې امنیې قوماندانۍ د کشفي عملیاتو پرمهال ۲۳زره او ۵۰۰ هغه وسایل کشف او ضبط کړي چې د تریاکو د حاصل اخیستنې او شېرې اېستلو لپاره کارول کېدل.
د طالبانو د کورنیو چارو وزارت د خبرپاڼې له مخې؛ یاد وسایل د تریاکو د کرکېلې پرمهال د حاصل اخیستنې او د شېرې اېستلو لپاره کارېدل.
د طالبانو تر واک لاندې د احصايې او معلوماتو اداره وایي، چې په تېرې سلواغې میاشت کې د هوایي ډګرونو او ځمکنیو بندرونو له لارې افغانستان ته ۲زره او ۹۱۸ بهرنیو وګړو تګراتګ کړی. یادې ادارې ویلي، چې دغه وګړي افغانستان ته د کار، سیل او د کورنیو د لیدو لپاره راغلي وو.
د طالبانو د احصایې او معلوماتو ادارې د سېشنبې په ورځ (د کب ۵مه) په یوه خبرپاڼه کې ویلي، ثبت شوې شمېرې ښيي چې په یاده موده کې د ۵۲ ښځو په ګډون ۱۵۰۷ بهرني وګړي هېواد ته راغلي او د ۲۴ ښځو په ګډون ۱۴۱۱ نور له هېواده وتلي دي.
طالبانو وړاندې ویلي و، چې د بهرنیو وګړو تر ټولو ډېر تګراتګ د نیمروز بندر، د هرات له هوايي ډګر او بندرونو، د تورخم او حیرتان بندرونو او د کابل هوايي ډګر له لارې شوی چې یو شمېر بهرنيو سېلانیانو تر ډېره د (بامیان، هرات، کندهار، ننګرهار، غور، بدخشان، کندوز، پکتیا، خوست، نورستان، بلخ، سمنګان او کوڼر) ولایتونو له لرغونو ځایونو لیدنې کړې.
طالبان داسې مهال له بهرنیو کارګرو او سېلانیانو هرکلی کوي، چې ګڼ افغانان پرې د طالبانو له لوري د کړۍ تنګولو او ناوړه اقتصادي وضعیت له امله د هېواد پرېښودو ته اړ شوي.
د طالبانو د بهرنیو چارو وزیر امیرخان متقي د ملګرو ملتونو د سیاسي چارو لپاره د سرمنشي مرستيالې روزمارې ډېکارلو سره په ټیلیفوني خبرو کې د پاکستان وروستي هوايي بریدونه چې پهکې ملکي وګړي په نښه شوي غندلي او د دغه پېښو د بشپړې څېړنې غوښتنه یې کړې ده.
د طالبانو د بهرنیو چارو وزارت د خبرپاڼې له مخې؛ متقي په دغه ټیلیفوني خبرو کې د پاکستان له لوري په تېرو څلورو کلونو کې پر افغانستان د هوايي بریدونو دوامداره پېښو ته اشاره کړې او ویلي یې دي، چې په یادو بریدونو کې یوازې ملکي وګړي په نښه شوي.
هغه زیاته کړې، هېڅکله هم داسې وسلهوال نهدي وژل شوي چې پاکستاني لوری یې د حضور ادعا کوي چې دا د پاکستان له لوري پر افغانستان لګېدلي تورونه بېبنسټه ثابتوي.
متقي همداراز ویلي: «په افغانستان کې وسلهوالې ډلې شتون نهلري او د کورني او بهرني ډیپلوماتانو په ګډون ټول اړخونه کولای شي د وروستي هوايي برید ځای ته ولاړ شي او حالت له نږدې وارزوي».
په خبرپاڼه کې راغلي، د ملګرو ملتونو مرستيالې اغلې ډيکارلو په دې خبرو کې د ملکي وګړو پر مرګ ژوبلې ژوره غمرازي څرګنده کړې او ویلي یې دي چې د هوايي بریدونو موضوع به د ملګرو ملتونو له غړو هېوادونو او ټولو اړخونو سره راپورته کړي.
خبرپاڼه زیاتوي، چې په دغه ټیلېفوني خبرو کې د دوحې د ناستو، کاري ډلو او نورو اړوندو موضوعاتو په اړه هم بحث او خبرې شوې.
د افغانستان لپاره د پاکستان ځانګړي استازي محمد صادق له خپل ازبک سیال سره د یوې انلاین غونډې پر مهال ویلي، چې د طالبانو په کوربهتوب زرګونه وسلهوال د ګاونډیو هېوادونو لپاره جدي امنیتي ګواښونه رامنځته کوي. هغه وایي، دامهال په افغانستان کې د ازبک وسلهوالو شمېر تر ۲۵۰۰ زیات دی.
هغه پر اېکس پاڼه لیکلي: «ما له خپل ازبک سیال سره د امنیتي ننګونو په اړه خبرې وکړې، چې د طالبانو لهخوا په افغانستان کې مېشت زرګونه ترهګرو د ګاونډیو هېوادونو لپاره ګواښونه رامنځته کړي دي».
هغه زیاته کړې، د راپورونو له مخې په افغانستان کې دامهال د ازبک وسلهوالو شمېر تر ۲۵۰۰ زیات دی چې ښايي تر تحریک طالبان پاکستان (TTP) وروسته دویمه لویه وسلهواله ډله وي.
تېره ورځ د روسیې د بهرنیو چارو وزارت هم په خپل تازه راپور کې ویلي و، چې په افغانستان کې شاوخوا ۲۰ تر ۲۳زره «ترهګر» حضور لري چې له دې ډلې تر نیمایي ډېر یې بهرنيان دي. په دغه راپور کې ویل شوي، داعش د افغانستان تر ټولو لویه ترهګره ډله ده چې شاوخوا ۳زره غړي لري.
همدارنګه د پاکستاني طالبانو تحریک شاوخوا ۵ تر ۷زره غړي، القاعده ۴۰۰ تر ۱۵۰۰، د ختیځ ترکستان اسلامي غورځنګ ۳۰۰ تر ۱۲۰۰، د ازبکستان اسلامي غورځنګ چې اوس یې نوم د ترکستان اسلامي حزب ته بدل شوی ۱۵۰ تر ۵۰۰ او جماعت انصارالله ۱۵۰ تر ۲۵۰ غړي په افغانستان کې لري.
د طالبانو د امربالمعروف، نهې عن المنکر او شکایتونو اورېدو وزارت وایي، په بدخشان کې یې هغه درې کوډګر نیولي چې د «دم، کوډو او تعویذ» په نومونو یې د کورنیو ترمنخ ستونزې جوړولې. یاد وزارت خبرداری ورکړی، چې په ټولنه کې چاته د دغه ډول کړنو اجازه نه ورکوي.
یاد وزارت د سېشنبې په ورځ (د کب ۵مه) ویلي، چې یاد کسان یې د ګڼ شمېر کوډو کتابونو او «غیر شرعي» تعویذونو سره یو ځای نیولي دي. نوموړي وزارت ویلي، چې دغه کسان به د نورو څېړونو په موخه عدلي او قضايي ادارو ته ور وپېژندل شي.
طالبانو له خلکو غوښتي، چې د داسې پېښو په لهمنځه وړلو کې ورسره همکاري وکړي او خبرداری یې ورکړی: «هېڅ چا ته به اجازه ورنه کړل شي؛ څو په ټولنه کې خرافاتي او غیر شرعي کړنې ترسره کړي».
د طالبانو د امربالمعروف، نهې عن المنکر او شکایتونو اورېدو وزارت تېره ورځ هم په غور، پروان او بامیان ولایتونو کې د ۷ کوډګرو د نیولو خبر ورکړی و. یاد وزارت وایي، تېره میاشت یې د هېواد په بېلابېلو برخو کې ۳۰ کوډګر هم نیولي وو چې تر څېړنو ګروېږنو وروسته یې عدليادارو ته یې ور پېژندلي دي.
د طالبانو تر واک لاندې د اریانا افغان هوایي شرکت ویلي، چې د ۱۴۰۴کال د سلواغې میاشتې په اوږدو کې دغه شرکت نږدې ۴۲زره مساپر او ۳۷۰ټنه سوداګريز توکي کورنیو او نړۍوالو سکټورونو ته انتقال کړي دي.
پر اېکس پاڼه د دغه شرکت په خپرې کړې خبرپاڼه کې راغلي، چې تېره میاشت د مساپر وړونکو او کارګو الوتنو له لارې ټولټال ۴۱زره او ۸۸۸ مساپر او ۳۷۰ټنه سوداګريز توکي انتقال شوي دي. د خبرپاڼې له مخې؛ نړۍوالو سکټورونو کې ډیلی، اسلاماباد، دوبۍ، استانبول، انقره، جده او مسکو شامل دي او په کورنیو سکټورونو کې کابل، کندهار، هرات او مزارشریف شامل دي.
خبرپاڼه زیاتوي، د سوداګریزو توکو ډېره برخه ډیلي او دوبۍ ته انتقال شوې چې له دې ۳۷۰ټنو څخه ۲۰۵ټنه صادرات او ۱۶۵ټنه واردات دي. د صادراتو مهم توکي وچه مېوه، هينګ، زعفران او لاسي صنایع دي.
د اریانا افغان هوایي شرکت ویلي: «دغه لاسته راوړنه د اریانا د عملیاتو د ظرفیت لوړوالي، تخنیکي چمتووالي او د هېواد د هوايي ترانسپورت د بنسټیز پرمختګ څرګندونه کوي».