د طالبانو د کورنیو چارو وزارت خبر ورکړی، چې په ۵ ولایتونو کې یې د یو لړ عملیاتو پر مهال ۱۰ کسان د «غلا، قتل او قمار» په تور نیولي دي. یاد وزارت زیاته کړې، نیول شوي کسان به تر پوښتنو ګروېږنو وروسته قضايي ادارو ته ور وپېژندل شي.
د طالبانو یاد وزارت د سېشنبې په ورځ (د کب ۵مه) په یوې خبرپاڼه کې ویلي، چې درې کسان یې د قمار په تور په جوزجان کې، ۵ کسان یې د غلا په تور په هلمند او هرات کې او د قتل په تور یې دوه کسان په غزني او لغمان ولایتونو کې نیولي دي.
په غزني کې د طالبانو ښاروال ابومحمد ثابت وايي، تېره اونۍ یې ۵۰۰ هغه هټۍ تړلې چې د ورکړل شوې نرخ پاڼې څخه یې سرغړونه کړې او توکي یې په لوړه بیه پلورل. طالبانو هټۍوالو ته خبرداری وکړی، چې سرغړونکي به عدلي او قضايي ادارو ته ور وپېژني.
په غزني کې د طالبانو ښاروال ویلي، د ښاري نظم او د بیو کنټرول لپاره یې کمېټې ټاکلې او د تېرې یوې اونۍ پرمهال یې ۵۰۰ هغه هټۍ تړلې دي چې توکي یې د دوی له تاکلو شویو بیو لوړ پلورل.
نوموړي زیاته کړې: «د روژې په اوله مو کميټې جوړې کړې، چې له ښار څخه یې لیدنه وکړه. چا چې سرغړونه کړې تقریبا د ۵۰۰ په شاوخوا کې یې دوکانونه مهر لاک شوي؛ تر څو د نرخ نامې مطابق دوی باید خرید او فروش وکړي».
هغه زیاته کړې، چې په دې برخه کې به یې فعالیتونه جدي وي او په منظم ډول یې په ښار کې د بیو د کنټرول په برخه کې څار دوام لري. هغه خلکو ته خبرداری ورکړی، چې د احتکار او د بیو د لوړولو څخه دې ډډه وکړي او د دوی د جوړو شویو نرخ پاڼو اړوند دې توکي وپلوري.
افغانستان انټرنشنل د یوشمېر ولایتونو څخه خبرونه ترلاسه کړي، چې ځينو هټۍوالو د روژې میاشتې له پیلېدو سره د خوراکي او غیرخوارکي توکو بیې لوړې کړې دي. د ښارونو اوسېدونکي د خلکو ناوړه اقتصادي وضعیت ته په کتو د سوداګرو او هټۍوالو احتکار او د بیو لوړول ناانصافي بولي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ (د کب ۴مه) ۵۱۱ کډوالې کورنۍ چې ټولټال ۲زره او ۴۲۴ کسان کېږي؛ له ایران او پاکستان نه افغانستان ته ستنې شوې دي.
د دغه کمېسیون د راپور له مخې؛ دغه کډوال د ننګرهار د تورخم، د کندهار د سپین بولدک، د هرات د اسلامکلا او د نیمروز د ورېښمو پله له لارې ستانه شوي دي. راپور زیاتوي، له دې ډلې ۱۵۸۲ کډوال د تورخم له لارې، ۸۰ د اسلامکلا له لارې، ۶۴۰ د ورېښمو پله له لارې او ۱۲۲ نور د سپین بولدک له لارې افغانستان ته ستانه شوي دي.
له بل پلوه د طالبانو د کډوالو او بېرته راستنېدونکو چارو وزارت خبر ورکړی، چې په تېرو درېیو میاشتو کې نږدې ۹۴زره کډوالې کورنۍ له ایران، پاکستان او ترکیې نه افغانستان ته ستنې شوې دي. د دغه وزارت په وینا؛ په دغه موده کې ۲۵۴زره او ۲۱۸ کسان له کورنیو پرته په جبري توګه ستانه کړای شوي دي.
د طالبانو د کډوالو او بېرته راستنېدونکو چارو وزارت زیاته کړې، چې په ورته موده کې ۳زره او ۶۴۸ بندیان د پاکستان له بېلابېلو زندانونو خوشې شوي دي.
د خیبر پښتونخوا هریپور ولسوالۍ چارواکو رسنیو ته ویلي، چې په تېرو شپږو میاشتو کې له دغه ولسوالۍ په خپله خوښه د ستنېدونکو افغان کډوالو شمېر کې زیاتوالی راغلی او دغه شمېر تر ۹۰ سلنې لوړ شوی.
د راپورونو له مخې؛ د دغه ستنېدونکو شمېر د روان ۲۰۲۶کال د فبرورۍ تر ۲۳مې نېټې ۵۷زره او ۳۶۶ تنو ته رسېدلی او اوس یوازې ۶زره او ۱۸۱ کسان په پنډغالو کې پاتې دي.
د هریپور مرستيال کمېشنر وسيم احمد په وینا، «په خپله خوښه د کډوالو د ستنېدو بهیر په منظمه توګه د اړونده ادارو په همغږۍ روان دی». هغه زیاته کړې، چې د ولسوالۍ اداره به د ځینو سیمو نقشه جوړه کړي؛ څو د ستنېدونکو او پاتې کډوالو شمېر په کره توګه روښانه شي.
د رسمي شمېرو له مخې؛ په درېیو پنډغالو پنیان، باسو مایرا او پډهانا کې د افغان کډوالو ټولیز شمېر ۶۳زره او ۵۴۷ کسانوو ته رسېدلی و؛ په داسې حال کې چې ۱۳زره په ښارونو او کلیوالو سیمو کې په کرایه شویو کورونو کې اوسېدل. اوس یوازې ۴زره او ۹۹۹ کسان په پنیان پنډغالي کې پاتې دي، باسو مایرا کمپ په بشپړ ډول تش شوی او په پډهانا پنډغالي کې یوازې ۶۱۵ د «پي.او.ار» کارت لرونکي او ۲۳ د اېسيسي کارت لرونکي پاتې دي.
هغه دارنګه ویلي، چې په پنډغالو کې جوړ شوي روغتیایي مرکزونه او ښوونیزې ادارې اوس د صوبايي حکومت تر ادارې لاندې فعالیت کوي او د ځایي خلکو خدمت ته دوام ورکوي. د چارواکو په وینا؛ هغه افغانان چې لا هم په پنډغالو کې پاتې دي، تر اختر وروسته ژر تر ژره خپل هېواد ته د ستنېدو لپاره چمتو دي. یوازې د يکشنبې په ماښام ۳۱۵ افغانان په خپله خوښه افغانستان ته ستانه شوي.
ورته مهال په پاکستان کې د ملګرو ملتونو د کډوالو عالي کمېشنرۍ (UNHCR) وياند قيصر اپريدی وايي، د ۲۰۲۳کال له سپټمبر میاشتې راهیسې د تورخم او نورو بېلابېلو لارو دوه مېلیونه او ۷۵زره افغان کډوال خپل هېواد ته ستانه شوي دي.
د بلوچستان په پنجګور ولسوالۍ کې د ډزو دوو بېلابېلو پېښو پرمهال د دوو افغان ښځو په ګډون اته کسان وژل شوي او درې نور ټپیان دي. ځایي چارواکو ویلي، دغه وژل شویو افغان مېرمنو په قاچاقي لاره پاکستان ته د ننوتو هڅه کوله.
د پنجګور مرستيال کمېشنر کبیر زركون د پېښې په اړه رسنیو ته وويل: «لومړۍ پېښه د پنجګور ښار له ۶۰ کیلومترۍ واټن پر چېدګي سیمه کې رامنځته شوې، چېرې چې وسلهوال موټرسايکل سپرو پر دوه تېرېدونکو موټرونو ډزې وکړې».
هغه زیاته کړه: «په دغه پېښه کې شپږ کسان ووژل شول. وسلهوالو دواړه موټرونه وسوځول او د پېښې له ځایه وتښتېدل». دارنګه د پنجګور په پروم سیمه کې د پاکستان امنیتي ځواکونو د دوو موټرونو د درېدو هڅه وکړه؛ خو یو موټر د تېښتې هڅه وکړه او امنیتي ځواکونو پرې ډزې وکړې. په دغه ډزو کې دوه افغان ښځې ووژل شوې او درې نور ټپیان شول.
د ځایي چارواکو په وینا؛ په دواړو موټرو کې افغان وګړي سپاره وو او په ناقانونه توګه یې غوښتل پاکستان ته داخل شي. ځایي چارواکو ویلي، ټپیان او جسدونه روغتون ته انتقال شوي؛ په داسې حال کې چې نور افغان وګړي د دوی د امنیتي ځواکونو لهخوا نیول شوي دي.
د طالبانو د کانونو او پټرولیم وزارت ویاند همایون افغان وايي، د ټاپي پروژې کارونه منظم روان دي او تر دې مهاله یې ۹۷ کیلومتره ساحه اواره کړې ده. هغه زیاته کړې، نوې نل لیکه هم سیمې ته رسېدلې چې له دې وروسته به یې د غځولو چارې پيل شي.
همایون افغان وايي، د نوې نل لیکې چارې به هم ژر پيل شي: «د ټاپي نل لیکې لپاره ۹۷ کیلومتره لاره اوار شوې او نوې نل لیکه ساحې ته رسېدلې ده. له دې وروسته به د دغه نل لیکې د غځولو چارې هم پيل شي او په ورځ کې به ۵۰۰ متره نل لیکه غځېږي».
د هغه په وینا؛ ټاکل شوې چې د ۲۰۲۶کال تر پایه د هرات مسیر چې ۱۵۳ کیلومتره دی بشپړ شي او عملا به دغه برخه ګټې اخیستنې ته وسپارل شي. د طالبانو او ترکمنستان چارواکو ټينګار کړی، چې د ټاپي پروژې کارونه یې له لومړیتوبونو څخه دي.
دغه پروژه په ۱۳۹۴کال کې د افغانستان، پاکستان، ترکمنستان او هند د مشرانو له لوري د ترکمنستان په مرو ښار او وروسته په ۱۳۹۶کال کې د یادو هېوادونو د چارواکو له لوري د افغانستان په هرات ولایت کې پرانېستل شوه.