د طالبانو د قبایلو، قومونو او سرحدونو چارو وزیر په کابل کې د خپلې ډلې د سرحدي پولیسو په یوې غونډه کې ویلي، چې د اسلامي نظام تر قلمرو لاندې د هر انچ خاورې ساتنه پر دوی د سر په بیه فرض ده. هغه زیاته کړې: «پر هغه کسانو ویاړو چې له خپلې خاورې دفاع کوي».
نوموړي د خپلې ډلې سرحدي ځواکونو ته زیاته کړې، چې د څلوېښت میلیونه افغانانو د خوندیتوب مسوولیت ورته د یو امانت په توګه سپارل شوی دی. هغه وویل: «د سرحدونو په ساتنه کې باید هېڅ ډول غفلت ونهشي».
ملا نور الله نوري زیاته کړه: «په خپل تاریخ باید مظبوط ودرېږو، له خپلې خاورې څخه دفاع وکړو او رښتینی سیاست باید وکړو». د طالبانو دغه چارواکي دا څرګندونې په داسې حال کې دي، چې دا ډله له پاکستان سره په سخت کړکېچ کې ښکېله ده او دا نن هم پر کابل د واکمنې ډلې او پاکستاني پوځیانو ترمنځ ننګرهار ولایت کې د ډیورنډ کرښې په اوږدو کې درنې جګړې شوې دي.
دغه جګړې د اچین، دوربابا او نازیانو ولسوالۍ په مربوطاتو کې شوې دي. په ختیځ کې د طالبانو قول اردو ویلي، چې د پاکستاني ځواکونو له لوري د دوی پر پوستو بریدونه شوي وو او دوی یې هم په مقابل کې ورته بریدونه کړي دي.
طالبانو ویلي، دغه بریدونه د ننګرهار په بهسودو ولسوالۍ کې د پاکستاني جېټ الوتکو له لوري پر ملکي وګړو د شویو هوایي بمباریو غچ اخیستنه نه وه.
