اسماعیل بقایي: امریکا د ایران پرضد د «ناسمو معلوماتو خپرولو» کمپاین پیل کړی
د ایران د بهرنیو چارو وزارت ویاند اسماعیل بقایي د امریکا له لوري د ایران د اوږد واټن وېشتونکو توغندیو جوړېدو او د لاریونونو پرمهال د ۳۲زره لاریون کوونکو د وژنې په اړه په کانګرس کې د ډونالډ ټرمپ د څرګندونو په ځواب کې ولیکل: «دا د ایران پر وړاندې د ناسمو معلوماتو خپرولو کمپاین دی».
د امریکا ولسمشر ډونالډ ټرمپ په کانګرس کې د خپلې کلنۍ وینا پرمهال ویلي، ایراني چارواکي پر داسې توغندیو کار کوي چې ډېر ژر امریکا ته رسېدلای شي. د امریکا ولسمشر ویلي: «ایراني چارواکي ډېر خطرناک دي. هغوی داسې توغندي جوړ کړي، چې اروپا او زموږ بهرنۍ اډې ګواښلای شي او اوس پر داسې توغندیو کار کوي چې ډېر ژر به امریکا ته ورسېږي».
ټرمپ ادعا کړې: «دوی په خپل هېواد کې ۳۲زره لاریون کوونکي ووژل. پر هغوی یې ډزې وکړې او ځینې یې په دار وځړول. موږ د سخت تاوتریخوالي د ګواښ له لارې هغوی د ډېرو نورو کسانو له اعدامولو راوګرځول».
