د اسراییل د پارلمان غړی: طالبان باید له نړۍوال مشروعیت څخه بېبرخې شي
د اسراییل د پارلمان غړي امیت هلاوي له افغانستان انټرنشنل-پښتو سره په مرکه کې ویلي، چې طالبان باید له نړۍوال مشروعیت څخه بېبرخې شي او د دغې ډلې د مخالفانو ملاتړ دې وشي.
د اسراییل د پارلمان غړي امیت هلاوي له افغانستان انټرنشنل-پښتو سره په مرکه کې ویلي، چې طالبان باید له نړۍوال مشروعیت څخه بېبرخې شي او د دغې ډلې د مخالفانو ملاتړ دې وشي.
نوموړي پر هند هم غږ وکړ، چې د طالبانو له ملاتړ څخه دې لاس واخلي، ګني په نېږدې وخت کې به دوی هم په نښه شي.
مخکې له دې چې د هند لومړي وزیر نرېندرا مودي په اسراییل کې پارلمان ته وینا وکړي، د افغانستان انټرنشنل خبریال رحمان بونیري د لیکود ګوند او د کنسیت (پارلمان) له غړي امیت هالېوي سره مرکه وکړه.
نوموړي د هغې پوښتنې په ځواب کې چې ښایي پاکستان غزې ته خپل ځواکونه ولېږي او د ولسمشر ټرمپ د سولې بورډ غړی هېواد به شي نو ایا په منځني ختیځ کې د پاکستان د تګلارې په تړاو خوشبیني لري، وویل: «زموږ تګلاره ډېره روښانه ده؛ موږ د چا له جامو، نېکټايي او خندا څخه نه اغېزمن کېږو، بلکې موږ دا ګورو چې نظریات یې څه دي؟ که چېرې پاکستان خپل بنسټیز اصول بدلوي، نو موږ کولی شو د هغې په اړه بیا فکر وکړو».
دا په داسې حال کې ده، چې څه موده مخکې د امریکا د بهرنیو چارو وزیر مارکو روبیو د پاکستان په په اړه وویل، چې دغه هېواد غزې ته د ځواکونو د لېږلو لپاره خپل چمتووالی ښودلی دی. روبیو همداراز ویلي و، پاکستان د هغو هېوادونو له ډلې دی چې غواړي د غزې لپاره د سوله ساتو په نوم د ځواکونو په ماموریت کې په خپله خوښه برخه واخلي.
خو وروسته بیا راپورونه خپاره شول، چې پاکستان غزې ته ځواکونه نهلېږي.
د رویټرز د راپور لهمخې، پاکستان د هغو پنځو هېوادونو په ډله کې نهدی چې په غزه کې د «نړۍوال ثبات ځواک» لپاره سرتېري لېږي. په غزه کې د نړۍوال ثبات ځواک قوماندان جاسپر جیفرز وویل، چې یوازې اندونیزیا، مراکش، قزاقستان، کوزوو او البانیا د سرتېرو لېږلو ژمنه کړې ده.
د اسراییل د پارلمان غړي امیت هلاوي په دې مرکه کې ویلي: «موږ په واشنګټن او نورو هېوادونو کې نفوذ لرو او دا نفوذ باید د دې لپاره وکارول شي چې طالبان له نړۍوال مشروعیت څخه بېبرخې شي، په ملګرو ملتونو کې ترې د رایې حق ورنهکړل شي او د مخالفو ځواکونو د راپورته کېدو ملاتړ وشي».
هغه زیاته کړه: «لومړی باید طالبان له مشروعیت څخه مطلق بېبرخې شي، بیا د مخالفو ځواکونو هڅول اړین دي، لکه څنګه چې په ایران کې د مخالفو هڅو ملاتړ کېږي، تر څو خلک د خپلو حقونو، ژوند او راتلونکي لپاره ودرېږي».
هلاوي څرګنده کړه، چې د دې اهدافو د ترلاسه کولو لپاره باید ټول عملي ګامونه ان پوځي اقدامات هم ترسره شي، ترڅو په دغو سیمو کې بنسټیز بدلون راشي.
په مرکه کې له نوموړي وپوښتل شول، چې د طالبانو په اړه باید د هند سیاست څه ډول وي؟ هغه وویل: «هند باید خپله تګلاره بیا وڅېړي، ځکه چې ډېر ژر یا وروسته به هند د نښه کېدو په حالت کې وي.»
نوموړی په داسې حال کې د هند او طالبانو ترمنځ د اړیکو په تړاو څرګندونې کوي، چې په افغانستان کې د طالبانو له حکومت سره د هند وروستۍ ډیپلوماتیکې اړیکې پیاوړې شوې دي. نوي ډیلي د سیمهییزو تحولاتو، امنیتي اندېښنو، اقتصادي ګټو او ستراتېژیکو محاسباتو په نظر کې نیولو سره خپله تګلاره له سره ارزوي او هڅه کوي چې په افغانستان کې خپل سیاسي او اقتصادي حضور وساتي.
دغه پرمختګ نه یوازې د دواړو لوریو ترمنځ د عملي تعامل د پراختیا معنا لري، بلکې دا هم څرګندوي چې په سیمه کې بدلېدونکي ځواکتوازن او نوې معادلې هېوادونه دې ته اړ کړي، څو د واقعبینانه سیاست پر بنسټ خپلې اړیکې تنظیم کړي.
